ایران ارمنیستان-ی دستکله‌دی

ایران‌ین ارمنیستان‌داکی سفیری مهدی سبحانی، ارمنیستان تهلوکه‌سیزلیک شوراسی‌نین کاتیبی آرمن قریقوریان ایله گؤروشونده ایران‌ین اولوسلار آراسی سرحدلرین دَییشمزلیگی و قونشو اؤلکه‌لرین اراضی بوتوولویونو دسته‌کلمه‌سی ایله باغلی مؤقعینی تصدیقله‌ییب.

ارمنی مطبوعاتی‌نین یازدیغینا گؤره، سبحانی بؤلگه‌دکی ژئوپولتیک موقعیتین دگیشدیریلمه‌سی جهدینین علیه‌ینه اولدوقلارینی بَیان ائدیب.

آرمن قریقوریان ایران‌ین سفیرینه ایران‌ین آیدین مؤقعینه گؤره تشکور ائدیب و ارمنیستان‌ین ایران ایله موناسیبتلره بؤیوک اؤنم وئردیگینی و هئچ بیر قووه‌نین ارمنیستانلا ایران آراسیندا اراضی علاقه‌لرینی پوزا بیلمه‌یه‌جه‌یینی وورغولاییب.

ایران بوندان اول روسیه‌نی آذربایجان و ناخچیوان آراسیندا ارمنیستان اراضیسیندن گئچه‌جک زنگه‌زور کوریدورونون یارادیلماسی ایده‌سینی دسته‌کلدیگینه گؤره تنقید ائدیب.

ایران‌ین خاریجی ایشلر ناظیری سعید عباس عراقچی دا "قونشولاریمیزین اراضی بوتوولویونه قوزئیدن، گونئیدن، دوغودان و یا باتیدان هر هانسی تهدید و یا سرحدلرین یئنیدن جیزیلماسی جهدلری تامامی ایله قبول‌ائدیلمزدیر و ایران اوچون قیرمیزی خطدیر" دئییب.

ایران خاریجی ایشلر ناظیرلی‌گینه چاغیریلان روسیه سفیری آلئکسئی دئدوو روسیه‌نین موضعیندن ناراضی اولدوغونو بیلدیریب. تهران حئساب ائدیر کی، بو کوریدورون یارادیلماسی اؤلکه‌نی تجرید ائتمک، ایران‌ین آوروپا و دونیانین قالان حیصّه‌سینه چیخیشینی محدودلاشدیرماق کیمی نتیجه‌لر وئره‌جک.

روسیه، آذربایجان و ارمنیستان‌ین ۲۰۲۰-جی ایل نوامبرین ۹-دا ایمضالادیغی اوچ‌طرفلی بیرگه آچیقلامادا قید اولونان زنگه‌زور کوریدورو طرفلر آراسیندا موذاکیره مؤوضوعسو اولاراق قالیر. بو یاخینلاردا باکی و ایروان باریش آنلاشماسیندان «زنگه‌زور کوریدورو» ماده‌سینی چیخاراراق، سونرادان موذاکیره‌یه راضیلاشسالار دا، سرگئی لاورووون آچیقلاماسیندان سونرا کوریدورون یارادیلماسی مسئله‌سی یئنیدن گوندمه گلیب.