زلنسکی: آتیشکسه دایر بیر پلان حاضیرلادیم
"بیر پلان حاضیرلادیم و بونو آمریکا باشقانییلا پایلاشماق ایسته‌ییرم چونکو آمریکایا باغلی بعضی نقطه‌لر وار"
اوکراینا دؤولت باشقانی ولودیمیر زلنسکی، آتیشکسه دایر بیر پلان حاضیرلادیغینی و بونو مؤوجود آمریکا بیرلشمیش دؤولتلری باشقانی جو بایدن باشدا اولماق اوزره دیگر باشقان نامیزدلری ایله پایلاشماق ایسته‌دیگینی سؤیله‌دی.
ایتالیانین کومو گؤلو ساحلینده‌کی کرنوبیو قصبه‌سینده هر ایل سپتامبر آیی باشیندا تشکیل ائدیله‌ن و بین الخالق اینکیشافلارین اله آلیندیغی آمبروستی فورومونا قاتیلان زلنسکی، بورادا ایتالیالی ژورنالیستلره، اوکراینا-روسیا ساواشی ایله باغلی قیمتلندیرمه‌لر وئردی.
زلنسکی، تورپاقلارینی بوراخمالاری ایستیقامتینده‌کی اولتیماتوملاری قبول ائده بیلمه‌یه‌جکلرینی و بونا گؤز یوما بیلمه‌یه‌جکلرینی دیله گتیردی.
آتیشکسه ایستیقامتلی بیر پلانی اولدوغونو دیله گتیره‌ن زلنسکی،
"بیر پلان حاضیرلادیم و بونو آمریکا باشقانییلا پایلاشماق ایسته‌ییرم چونکو آمریکایا باغلی بعضی نقطه‌لر وار. اومود ائدیره‌م بو پلانی بایدنه و نامیزدلره گؤسترمه و گئری‌بیلدیرم آلما فورصتی تاپارام. بو آندا هئچ بیر شئی پایلاشمادیق. ایلک تماس بایدن ایله اولاجاق" ایفاده‌لریندن ایستیفاده ائتدی.
زلنسکی، روسیانین هوجوملاریندا اؤزلرینه قارشی، شیمالی کره مالی موشکلردن ایستیفاده ائتدیگینی، بونلارا دایر قالیقلاردان ویدئو قئیدلرینه قدر دلیللری اولدوغونو، عینی زاماندا ایران مالی موشک و اینسانسیز واسیطه‌لردن ده ایستیفاده ائدیلدیگینی ادعا ائتدی.
"ساواشین سونونا باشلانغیجدا اولدوغوموز وضعیتدن داها یاخینیق" دئیه‌ن زلنسکی، ملموس آنلاشمالارلا اقتصادی گوجلندیردیکلرینی و بو شکیلده ساواشین سونونا یاخینلاشدیقلارینی ایفاده ائتدی.
