حماس: یئنی اؤنریلره ائحتیاجیمیز یوخدور

حماس خبر وئریب کی، ایسرائیل‌ین باش ناظیری بنیامین نتانیاهو، غزه ساواشینی دایاندیرماق و غزه ایله میصر آراسینداکی فیلادئلفی کوریدوروندا قالماغا داوام ائده‌رک اسیرلرین موبادیله‌سی ایله باغلی راضیلیغا گلمک ایسته‌میر.

حماس ایسرائیل‌ین باش ناظیری نتانیاهونون فیلادئلفی کوریدوروندا قالماقدا ایصرارلی اولماسی ایله باغلی آچیقلاما وئریب.

آبش مئدیاسیندا واشینقتونون اسیر موبادیله‌سی و آتیش‌کس اوچون یئنی بیر تکلیف حاضیرلادیغی خبرینه ایشاره ائدیلن آچیقلامادا، "یئنی اؤنریلره ائحتیاجیمیز یوخدور" دئییلدی.

آچیقلامادا نتانیاهونون ایسرائیل اوردوسونون فیلادئلفی کوریدوروندا قالماغا داوام ائتمه‌سینی ایستمه‌دیگی، غزه ساواشینین دایاندیریلماسی و اسیرلرین دگیشدیریلمه‌سی ایله باغلی راضیلیغا گلمک ایستمه‌دیگی وورغولانیب و بئله قید ائدیلیب: "ایندی ائدیلمه‌لی اولان شئی نتانیاهو و حؤکومتینه باسقی گؤسترمک، اونلاری داها قاباق راضیلاشدیریلمیش آنلاشمایا عمل ائتمه‌یه مجبور ائتمک‌دیر."

آچیقلامادا نتانیاهونون مقصدینین غزه ساواشینی اوزاتماق اولدوغو بیلدیریلیب.

آیریجا آچیقلامادا، "بیز خالقیمیزا قارشی ساواشی اوزاتماق اوچون دانیشیقلاردان ایستیفاده ائدن نتانیاهونون و اونون حیله‌لرینین ته‌له‌سینه دوشمه‌مک باره‌ده خبردارلیق ائدیریک" دئییلدی.

اؤتن گئجه ایسرائیل‌ین باش ناظیری نتانیاهو «ایسرائیل‌لی محبوسلارین غزه‌دن چیخاریلماسینین قارشیسینی آلماق» بهانه‌سی ایله غزه‌-میصر سرحدیندکی فیلادئلفی کوریدوروندان گئری چکیلمه‌یه‌جکلرینی بیر داها بَیان ائدیب.

نتانیاهو و حؤکومتی مؤوجود تکلیفلره یئنی ماده‌لر علاوه ائتمکله غزه‌ده آتیش‌کس و محبوس موبادیله‌سی دانیشیقلاریندا حماس ایله راضیلیغا گلمه‌مکله گوناهلاندیریلیر.

ایفراطی ساغچی ائتلاف طرفداشلارینین غزه‌یه هوجوملار دایاندیریلاجاغی تقدیرده حؤکومتی دئویرمک تهدیدلری قارشیسیندا نتانیاهو ایسرائیل‌ده و اولوسلار آراسی آرئنادا آتیش‌کس راضیلاشماسینی سابوتاژ ائتمک ایله گوناهلاندیریلیر.

نتانیاهونون موقاویله لاییحه‌سینه علاوه ائتدیگی ماده‌لرین و خوصوصی ایله فیلادئلفی کوریدورونا، میصر-غزه سرحد خطینه نظارتی ساخلاماقدا ایصرارلی اولماسینین دانیشیقلاری چتینلشدیردیگی وورغولانیر.