زلنسکی: یوزلرله روس عسگری اوکراینا اوردوسونا تسلیم اولدو

اوکراینا دؤولت باشقانی ولودیمیر زلنسکی، یوزلرله روس عسگرینین اوکراینا اوردوسونا تسلیم اولدوغونو و اؤزلرینه یاخشی داورانیلدیغینی سؤیله‌دی.

زلنسکی، اوکراینا گوجلرینین روسیا فدراسیونوندا اولان کورسک بؤلگه‌سینین ۷۴ مسکونلاشما واحیدینی ایداره آلتینا آلدیغینی دا سؤزلرینه علاوه ائتدی.

زلنسکی، "باش قرارگاه باشقانیمیز، بیرلیکلریمیزین کورسک بؤلگه‌سینده‌کی ۷۴ مسکونلاشما واحیدینی ایداره آلتیندا توتدوغونو بیلدیردی./…/ یوزلرله روس عسگری تسلیم اولدو، هامیسینا یاخشی داورانیلیر" دئیه دانیشدی.

اوکراینا سلاحلی قوتلری باش قرارگاه باشقانی آلکساندر سیرسکی، زلنسکییه اوکراینا بیرلیکلرینین کورسک بؤلگه‌سینده باشلاتدیقلاری عملیاتی داوام ائتدیردیگینی بیلدیرمیشدی. سیرسکییه گؤره اوکراینا سلاحلی قوتلری بو آندا روسیا تورپاقلارینین ۱۰۰۰ کیلومتر مربعلیک ساحه‌سینی ایداره آلتیندا توتور.

اوکراینا گوجلرینین کورسک بؤلگه‌سینده باشلاتدیغی عملیاتین آردیندان اونلارلا روس عسگرینین تسلیم اولوشونو گؤستره‌ن ویدئولار سوسیال مئدیادا گدولاشماغا باشلادی.

ادعالارا گؤره تسلیم اولانلار آراسیندا "آحمات" آدلی چئچئن خصوصی قوت بیرلیگینین منسوبلاری دا وار. چرشنبه آخشامی گونو چئچئن بیرلیگینین باشچیسی آپتی آلاودینوو، "آحمات چئچئنیستان" بؤلوگونون ۵ عسگرینین اسیر دوشدوگونو، آنجاق اسیرلرین "آحمات" خصوصی تیمی ایله علاقه‌سی اولمادیغی سؤیله‌دی.

آلاودینوو تلگرام کانالیندا پایلاشدیغی ویدئودا، «اسیر دوشه‌ن بیر چئچئن آرتیق قدیروو گوجلرینین عضوو دئییل/…/ بیر چئچئن اوچون اسیر دوشمکدن داها اوتانج وئریجی بیر شئی یوخدور" دئدی.