آوروپانین ان بؤیوک آتوم الکتریک سانترالیندا یانغین باش وئریب
روسیانین ایلحاق ائتدیگی زاپروژیا آتوم الکتریک سانترالیندا (NGS) یانغین باش وئریب.
روسیانین ایلحاق ائتدیگی زاپروژیا آتوم الکتریک سانترالیندا (NGS) یانغین باش وئریب.
روسیانین آتوم انرژی تشکیلاتی روس اتوم زاپروژیا آتوم الکتریک سانترالینین سویوتما سیستمیندهکی یانغینین نظارت آلتینا آلیندیغینی آچیقلاییب.
روس اتومون روسیا خبر آژانس لارینا وئردیگی آچیقلامادا زاپروژیا آتوم الکتریک سانترالینین سویوتما سیستمیندهکی یانغینین اوکراینانین اینسانسیز هاوا آراج لاری (ایها) ایله حیاتا کئچیردیگی هوجوم نتیجهسینده باش وئردیگی بیلدیریلیب.
آچیقلامادا سانترالین سویوتما سیستمینه جدی زیان ووران هوجوم نتیجهسینده باش وئرن یانغینین نظارت آلتینا آلیندیغی وورغولاناراق "بو حادثه اوکراینا رسمیلرینین تؤرتدیگی آتوم ترورو کیمی قیمتلنیله بیلر ایفادهلرینه یئر وئریلیب.
زاپروژیا ویلایتینین فرمانداری یوگنی بالتسکی ده یایدیغی بیاناتدا یانغینین نظارت آلتینا آلیندیغینی و بؤلگه اوچون هئچ بیر تهلوکهنین اولمادیغینی بیلدیریب.
یوگنی بالتسکی داها اول وئردیگی بیاناتدا اوکراینا اوردوسونون حیاتا کئچیردیگی هوجوم نتیجهسینده زاپروژیا آتوم الکتریک سانترالینین سویوتما سیستمینده یانغین باش وئردیگینی بیلدیرمیشدی.
اوکراینا پرزیدنتی ولودیمیر زلنسکی ایسه هوجومون روسیا طرفیندن تؤردیلدیگینی دئییب.
رسمی ایکس اینترنت صحیفهسینده پایلاشیم ائدن ولودیمیر زلنسکی دئییب: "روس ایشغالچیلاری زاپروژیا آتوم الکتریک سانترالینین یئرلشدیگی بؤلگهده یانغین تؤرتدی.
رادیاسیون سویهسینین ایلکین معلوماتلارا گؤره، نورمال اولدوغونو دئین ولودیمیر زلنسکی بونون عینی شکیلده داوام ائده بیلمهیهجگینی بیلدیریب.
اوکراینا لیدئری بیان ائدیب کی، روسیا آتوم الکتریک سانترالینی اله کئچیردیگی ایلک گوندن بری اوکراینانی، آوروپانی و دونیانی شانتاژ ائدیر.
دونیانین و اولوسلار آراسی آتوم انرژیسی آژانسینین (UAEA) حرکته کئچمهسینی گؤزلدیگینی وورغولایان ولودیمیر زلنسکی دئییب:
"روسیا بونا گؤره مسئولیت داشیمالیدیر. یالنیز اوکراینانین زاپروژیا آتوم الکتریک سانترالینا نظارتی نورمال وضعیته قاییتماغا و تام تهلوکهسیزلیگه ضمانت وئره بیلر".
اولوسلار آراسی آتوم انرژیسی آژانسینین ایکس صحیفهسینده مؤوضوع ایله باغلی ائدیلن پایلاشیمدا بو ایفادهلره یئر وئریلیب:
"اولوسلار آراسی آتوم انرژیسی آژانسینین متخصص لری دونن آخشام ساعاتلاریندا ائشیدیلن چوخ سایلی پارتلاییشلاردان سونرا زاپروژیا آتوم الکتریک سانترالینین شیمال حیسهسیندن توند توستونون یوکسلدیگینین شاهیدی اولوبلار. اکیپه سویوتما قوللهلریندن بیرینه اینسانسیز هاوا آراجی ایله هوجوم ائدیلدیگی ایله باغلی معلومات وئریلیب.
قئید ائدک کی،اوکراینانین جنوب-شرقینده یئرلشن زاپروژیا آتوم الکتریک سانترالی آوروپانین ان بؤیوک آتوم الکتریک نیروگاهی دیر. روسیا 2022-جی ایلین مارس آییندا آتوم الکتریک نیروگاهینی اله کئچیریب.
