حماس‌، تورکیه‌یه تشکور ائتدی

حماس‌، سیاسی دفتری رهبری اسماعیل هنیه‌نین ایران‌دا اؤلدورولمه‌سین‌دن سونرا ایلک آندان باش‌ساغلیغی وئردیگی و بؤیوک بیر هیئت ایله دفن مراسیمینده ایشتیراک ائتدیگی اوچون، تورکیه‌یه تشکور ائتدی.

حماس اینترنئت سایتیندا وئردیگی آچیقلامادا حرکاتین لیدئری هنیه‌نین اؤلدورولمه‌سینه گؤره باش‌ساغلیغی وئرن بوتون اؤلکه لیدئرلرینه، حؤکومتلره و شخصلره تشکور ائتدی.

حماس تورکیه‌یه ایلک آندان باش‌ساغلیغی وئردیگینه و دفن مراسیمینده ایشتیراکینا گؤره تشکور ائده‌رک، "ایلک آنلاردان تورکیه جمهور باشقانی و مسئوللاری اولاراق باش‌ساغلیغی وئرن و یاردیم گؤسترن تورکیه‌یه تشکور ائتمک ایستردیک. جنازه مراسیمینه رسمی و میللت سویه‌سینده ان چوخ ایشتیراک ائدن تورکیه‌یه پرئزیدئنت، حؤکومت، مجلیس و خالق اولاراق سیزه تشکور ائدیریک" دئدی.

آچیقلامادا جنازه‌نین قارشیلانماسی و دفن ائدیلمه‌سینه گؤره ایران جمهور باشقانی و خالقینا، ائله‌جه‌ ده قطره تشکور ائدیلیب.

حماس آچیقلامادا بئله یازیب: "شهیدلریمیزین قانینا و خالقیمیزین فداکارلیغینا، تورپاقلارین آزاد ائدیلمه‌سینه‌، باشکندی قودس اولماقلا تام باغیمسیز و موستقیل فیلیسطین دؤلتی‌نین قورولماسینا دایر اومید و ایستکلرینه صادیق قالاجاغیمیزی بیان ائدیریک".