غزه‌ده هئپاتیت اپیدئمیسی خبردارلیغی

ایسرائیل‌ین هوجوملارا باشلادیغی ۷ اکتبردان اول غزه‌ده جمعی ۸۵ هئپاتیت حادیثه‌سی اولدوغو حالدا، بو گون بو رقمین ۱۰۰ مینه یوکسلدییی بیلدیریلیر.
غزه اوچون قان باغیشی کمپینی چرچیوه‌سینده گئچیریلن مطبوعات کنفرانسیندا فیلیسطین‌ین ساغلیق باخانی مجید آونی محمد ابو رمضان غزه‌ده ساغلیق بخشی‌نین سورونلارینی و منفی ساغلیق وضعیتینی دگرلندیردی.

ایسرائیل‌ین هوجوملاریندا غزه‌ده ساغلیق آلت یاپیسی‌نین یوزده ۸۰-دن چوخونون داغیلدیغینی، خسته‌خانالارین چوخونون خیدمتدن چیخدیغینی، فعالیتینی داوام ائتدیرن خسته‌خانالارین ایسه یالنیز بیر بؤلومونون چالیشدیغینی بیلدیرن ابو رمضان، "خسته‌خانالار بیرباشا هوجوما معروض قالماسی و یا ساغلیق چالیشانلاری‌نین یئر دَییشمه‌سی، الئکتریک انئرژیسی‌نین کسیلمه‌سی، یاناجاق اکسیکلیغی، تمیز سویون اولماماسی، پیس سولارین داشماسی، برک آشغاللارین ییغیلماسی و اپیدئمیک خسته‌لیکلرین یاییلماسی، ساغلیق بخشی‌نین اوزرینه جیدّی یوک قویوب." دئدی.

غزه‌نین اپیدئمی، ائله‌جه‌ ده اینسانی و اکولوژی فلاکتلرین آستاناسیندا اولدوغونو قید ائدن ابو رمضان، بو وضعیتین سو و یا تنفس یولو ایله گئچه‌ن خسته‌لیکلرین نتیجه‌سی اولدوغونا دقت چکیب.

غزه‌ده گؤرولن اپیدئمی خسته‌لیکلری حاقیندا بیلگی وئرن ابو رمضان، "ایسرائیل‌ین هوجوملاریندان اول بوتون غزه‌ده ۸۵ هئپاتیت حادیثه‌سی وار ایدی، ایندی بو رقم ۱۰۰ مینی گئچیب. آیریجا غزه‌ده دامجی یولو ایله گئچه‌ن تنفس یولو خسته‌لیکلری، قاشینما کیمی دری خسته‌لیکلری، باکتری‌ قایناقلی خسته‌لیکلر اپیدئمیسی وار" دئدی.