خالد مشعل: دانیشیقلارا گئتمهیهجهییک و ایسرائیلی تانیمایاجاییق
حماسـین خاریجی ایشلر اوزره رهبری خالد مشعل: بوتون بؤلگه و دونیا بیلمهلیدیر کی، ایسرائیل دهلی اولوب
حماسـین خاریجی ایشلر اوزره رهبری خالد مشعل، حماس سیاسی دفترینین رهبری اسماعیل هنیهنین دفن مراسیمینده "دانیشیقلارا گئتمهیهجهییک و ایسرائیلی تانیمایاجاییق" دئدی.
مشعل ایرانین باشکندی تهراندا سوءقصد نتیجهسینده اؤلدورولن هنیه اوچون قطرین باشکندی دوحهده امام محمد بین عبدالوهاب مسجیدینده گئچیریلن دفن مراسیمینده چیخیش ائتدی.
مشعل هنیهنین غزه شهرینین شاطی قاچقینلار دوشرگهسینده اؤز خالقی آراسیندا یاشادیغینی و خالقینین آغری و سئوینجینه شریک اولدوغونو بیلدیردی.
مشعل "سئویملی قارداشیمیز، لیدئریمیز، شهید فرماندهیمیز ابو ال عابد اسماعیل عبدالسلام هنیه، موجاهید اولاراق یاشامیش و ربی ایله شهید اولاراق گؤروشموشدور" دئدی.
مشعل "ایسرائیل باش وئرنلردن درس آلمادی" دئدی.
او، "عصر بویو لیدئرلریمیزی اؤلدوردولر، بس نه اولدو؟ بیر لیدئر شهید اولدو، باشقاسی اونون آردینجا گئتدی. شهید اؤلور، یئرینده باشقا بیری دیریلیر. بئلهلیکله، خالقیمیز قورتولوش یولونو داوام ائتدیریر" دئدی.
تهدیدلرین اونلاری چکیندیره بیلمهیجهگینی وورغولایان مشعل سؤزلرینی بئله داوام ائتدیردی: "تهلوکهلر بیزی ذره قدرده اولسا، پرینسیپلریمیزدن اوزاقلاشدیراماز. فیلیسطین دوغودان باتییا، قوزئیدن گونئیه بیزیم وطنیمیز اولاراق قالاجاق. بیزدن نه قدر اینسان اؤلدورسهلر ده، بیز دانیشیقلارا گئتمهیهجهییک و ایسرائیلی تانیمایاجاییق".
مشعل، "بوتون بؤلگه و دونیا بیلمهلیدیر کی، ایسرائیل دهلی اولوب. اونا گؤره ده هر یئری هدفه آلیر. ایسلام دونیاسینین لیدئرلرینه سسلنیرم، امتین اؤزونه گلمک واختیدیر" دئیهرک سؤزلرینی تاماملادی.
ایلگیلیلی خبرلر
آذربایجان سیلاحلی قووهلرینین ناخچیواندا مانورو
ناخچیواندا یئرلشن توپچو بؤلمهلری گرچک ساواش شرایطینه اویغون تعلیملر گئچیریب
