غزهده اوشاقلار اوچون آتشکس چاغریسی
"اگر بو ساواش داوام ائتسه بیر اوشاق نسیلینین هامیسینی ایتیرمه تهلوکهسی ایله قارشی قارشییا قالاجاغیق"
غزه، بیر اوشاق نسیلینین هامیسینی ایتیرمه تهلوکهسی ایله قارشی قارشییادیر.
بیرلشمیش میللتلر ژنو دفتری رسمی ایکس حسابیندان پایلاشیلان ویدئودا، بیرلشمیش میللتلر یاخین دوغوداکی فیلیسطینلی مهاجیرلره کؤمک و ایش تاپما آژانسی (اونروا) ارتباط مودورو "ژولیت توما"، ایسرائل سالدیریلاری آلتینداکی غزهده اوشاقلارین وضعیتینه باغلی بیلگی وئردی.
ایسرائل سالدیریلارینین باشلادیغی گوندن بو یانا ان آز ۶۰۰ مین اوشاغین اوخولا گئدهبیلمهدیگینی ایفاده ائدن "توما"، بیر چوخ اوخولون باغلاندیغینی، اونروا مکتبلرینین ایسه سیغینما یئرلرینه چئوریلدیگینی قئید ائتدی.
توما بئله دئدی: "بو دئمک اولور کی، اگر بو ساواش داوام ائتسه بیر اوشاق نسیلینین هامیسینی ایتیرمه تهلوکهسی ایله قارشی قارشییا قالاجاغیق".
اوشاقلارین اوخولدان اوزاق قالما مدتینین تحصیلدهکی ایتکیلرینین جبرانینی چتینلشدیرجگینی وورغولایان توما، سون اولاراق اوشاقلار اوچون آتشکس ائدیلمهسی چاغریسی ائتدی.
ایسرائلین ۷ اکتبردان بو یانا غزهیه تشکیل ائتدیگی سالدیریلاردا ان آز ۱۵ مین ۶۹۴و اوشاق، ۱۰ مین ۲۷۹و قادین اولماقلا ۳۸ مین ۳۴۵ فیلیسطینلی اؤلدو، ۸۸ مین ۲۹۵ نفر یارالاندی.
ییخینتی آلتیندا هله ده مینلرجه اؤلو اولدوغو بیلدیریلرکهن خالقین سیغیندیغی خستهخانا و تحصیل قورولوشلاری هدف آلیناراق سیویل آلتیاپی دا داغیلیر.
