ایسرائیل‌ده اورتودوکس یهودیلری عسگره آلیناجاق

ایسرائیل مدافعه ناظیری یواف گالانت، اوردونون گلن آیدان اعتباراً اولترا اورتودوکس (حریدی) یهودیلری عسگره آلماغا باشلایاجاغینی بیلدیردی.

مدافعه ناظیرلیگی اوفیسیندن ائدیله‌ن شرحه گؤره، گالانت، ایسرائیل باش قرارگاه باشقانی هرزی هالوی و دیگر مسئوللارلا ائتدیگی ییغینجاغین آردیندان، فوق اورتودوکس یهودیلرین آگوستدان اعتباراً عسگره آلینماسینا باغلی ایسرائیل اوردوسونون توصیه‌سینی تصدیقله‌دی.

ییغینجاقدا، اولترا اورتودوکس یهودیلرین عسگره آلینماسینین عملیاتی بیر لزوم و کقاریشیق اجتماعی بیر مسئله" اولدوغونو وورغولایان گالانت ایله هالوی، اولترا اورتودوکس عسگرلرین "حیات طرزلرینی داوام ائتدیرمه‌لرینه" ایجازه وئریلمه‌سی لازیم اولدوغونو ایفاده ائتدی.

ایسرائیللی لائیک پارتیلر، خصوصیله غزه‌یه هوجوملارین داوام ائتدیگی، شیمالدا لبنان حزب اللهی ایله قارشیدورما ریسکینین آرتدیغی بیر دؤورده، دیندار یهودیلرین ده دؤیوش یوکونون آلتینا الینی قویماسینی ایستییردی.

نتانیاهو حکومتینین کوالیسیون اورتاغی، آریا دری لیدئرلیینده‌کی شاس ایله موشه گافنی لیدئرلیینده‌کی بیرلشمیش تؤورات یهودیلیگی کیمی حریدی پارتیلری، دیندارلارین سلاح آلتینا آلینماسینا شدتله قارشی چیخیردی.

ایسرائیل یوکسک محکمه‌سی، ۲۵ ژوئنده سس بیرلیگیله اولترا اورتودوکس یهودی کیشیلرین مجبوری عسگرلیک‌دن آزاد توتولماسینین قانونی دایاغینین اولمادیغینا و عسگرلییه اویغون اولانلارین وظیفه‌یه آلینماسی لازیم اولدوغونا قرار وئرمیشدی.

قراردا، عسگره آلینمایانلارین جمعیت طرفیندن مالیه‌یه ائدیله‌ن اجتماعی کؤمک و تحصیل کؤمکلریندن ده فایدالانابیلمه‌یه‌جکلرینه یئر وئریلمیشدی.

حریدی کیشیلرین عسگرلیک خیدمتینی یئرینه یئتیرمه‌سی لازیم اولدوغو ایستیقامتینده‌کی قرارین سیاسی و اجتماعی نتیجه‌لرینین اولماسی گؤزلنیلیر.

تاریخی اهمیته صاحب بو قرار، ایسرائیلده یئنی بیر ایچ قاریشیقلیغا سبب اولما و مد‌نی بیر قارشیدورمانی قیزیشدیرما پتانسیلینه صاحبدیر.

چوخو، دینی سببلرله عسگره گئتمه‌یی رد ائد‌ن حریدیلر، ۹ میلیونلوق اؤلکه‌ده اهالینین تخمیناً یوزده ۱۲سینی میدانا گتیریر.