ایسرائیل مدافعه ناظیریندن حؤکومته چاغری

ایسرائیل مدافعه ناظیری یواف گالانت، حؤکومته "غزه یولاغینداکی ایسرائیللی اسیرلرین گئری آلینماسی اوچون حماس ایله راضیلاشمایا چاتیلماسی ایستیقامتینده‌کی فرصتین قاچیریلماماسی" چاغریسی ائتدی.

ایسرائیل اوردو رادیوسوندا نشر اولونان خبره گؤره گالانت، اسیر یاخینلاریندان بعضیلری ایله بیر آرایا گلدی.

گالانت دئدی: ایسرائیلده‌کی تهلوکه‌سیزلیک سیستمینین بوتون واحیدلری ایله بیرلیکته ایسرائیللی اسیرلرین گئری گتیریلمه‌سی آنا هدفیمیزدیر و یارانان بو فرصتدن فایدالانماق اوچون الیمزدن نه گلیرسه ائله‌مه‌لییک.

غزه‌ده‌کی عسگری باسقینین راضیلاشمایا دوغرو ایرلیله‌مه‌یی ممکون ائد‌ن شرطلری یاراتدیغینی مدافعه ائد‌ن گالانت بئله دئدی: ایسرائیل تهلوکه‌سیزلیک گوجلری قارشی‌دورمانی نئجه دایاندیراجاغینی و لازیم اولدوغوندا غزه‌نین هر هانسی بیر یئرینده یئنیدن نئجه باشلاداجاغینی یاخشی بیلیر.

ایسرائیللی ناظیر گالانت بئله وورغولادی: راضیلاشمانی حرکته گئچیرمک اوچون بو عسگری تضییقدن فایدالانماق و فرصتی قاچیرماماق لازیمدیر.

اسیر موبادیله‌سی مؤوضوعوندا راضیلاشماغا چاتیلماسی، آتش‌کسین تامین ائدیلمه‌سی اوچون تل آویو ایله حماس آراسیندا گله‌جک گونلرده مصر و قطرین آراجیلیغیندا غیر مستقیم مذاکیره‌لرین تکرار ائدیلمه‌سی گؤزلنیلیر.

ایسرائیل ایچ کشفیات تشکیلاتی شین-بتین (شاباک) مودورو "رونن بار" لیدئرلیگینده‌کی ایسرائیللی مذاکیره هیئتی، اسیر موبادیله‌سی مذاکیره‌لری و رفح سرحد قاپیسینین ایداره‌سی حاقینداکی گؤروشمه‌لره قاتیلماق اوزره دونن مصره گئتمیشدی.

آیریجا غزه‌ده آتش‌کس اوچون مذاکیره‌لرین یئنی دؤورونون باشیندا، آمریکا مرکزی کشفیات تشکیلاتی (سیا) مودورو "ویلیام بورنس" لیدئرلیگینده بیر هیئتین مصره چاتدیغی بیلدیریلمیشدی.

حماس ایسه ایسرائیلین غزه یولاغینا هوجوملارینی دایاندیرماق اوچون راضیلاشماغا چاتماق آدینا مثبت و منعطف بیر توتوم سرگیلدیکلرینی، ایسرائیل باش ناظیری بنیامین نتانیاهونون ایسه مذاکیره‌لرین اؤنونده‌کی مانعه‌لری آرتیردیغینی ایفاده ائتمیشدی.