بیرلشمیش میللتلر تشکیلاتی؛ غزهده باش وئرن داغینتیلار
اوردوسونون اکتبرین 7-دن بو یانا 77 مین تون پارتلاییجیدان ایستیفاده ائتدیگی غزهده 87 مین ائو تامامیله داغیدیلیب، توپلامدا ایسه 297 مین ائو زدلنمیش و یاشاییش اوچون یارارسیز حالا دوشموشدور
ایسرائیلین اکتبرین 7-دن بری هوجوملارینی داوام ائتدیردیگی غزه زولاغیندا بینالارین یاریدان چوخونون داغیدیلدیغی بیلدیریلیب.
بیرلشمیش میللتلر تشکیلاتینین (بمت) یاخین شرقدهکی فیلیسطینلی قاچقینلارا یاردیم و ایشلر اوزره آژانسی (اونروا) سوسیال مئدیا حسابیندا غزهدهکی وضعیتله باغلی آچیقلاما یاییب.
آچیقلامادا غزهده باش وئرن داغینتیلارین تصویر اولونماز اولدوغو وورغولانیب و بؤلگهدهکی بینالارین یاریدان چوخونون داغیلدیغی قید ائدیلیب.
آچیقلامادا ایسرائیلین هوجوملاری نتیجهسینده یارانان داغینتیلارین آرادان قالدیریلماسی اوچون ایللر لازیم اولاجاغی بیلدیریلیب، "بو موحاریبهنین روحی سارسینتیسیندان ساغالماق داها چوخ واخت آپاراجاق." بَیاناتی داخیل ائدیلیب.
بَیاناتدا همچینین غزهدهکی اضطرابلارا سون قویولمالی اولدوغو وورغولانیب و آتیشکس چاغیریشی ائدیلیب.
غزهدهکی حؤکومتین مئدیا ایدارهسینین 24 می تاریخینده وئردیگی آچیقلامایا گؤره، ایسرائیل اوردوسونون اکتبرین 7-دن بو یانا 77 مین تون پارتلاییجیدان ایستیفاده ائتدیگی غزهده 87 مین ائو تامامیله داغیدیلیب، توپلامدا ایسه 297 مین ائو زدلنمیش و یاشاییش اوچون یارارسیز حالا دوشموشدور.
بمت-دن اوّلکی آچیقلامادا غزهداکی داغینتیلارین چیخاریلماسینین 14 ایل چکه بیلجهیی بیلدیریلمیشدی.
