پاشینیان: هر هانسی بیر اؤلکه‌دن تورپاق ایستگیمیز اولمامالی
"ارمنیستانین تورپاقلاری بودور. بو سرحدلردن باشقا امللریمیز اولمامالیدیر"
ارمنیستان باشباخانی نیکول پاشینیان، ارمنیستانین حاضرداکی خریطه‌ده باشقا تورپاغی اولمادیغینی و هر هانسی بیر اؤلکه‌دن تورپاق ایستکلرینین اولماماسی لازیم اولدوغونو آچیقلادی.
باشباخان پاشینیان، ارمنیستان حکومتینین یوتوب کانالیندان یایینلانان مطبوعات توپلانتیسیندا، ژورنالیستلرین سواللارینی جاوابلادی.
پاشینیان، الینده توتدوغو ارمنیستانین حاضرداکی سرحدلرینین گؤستریلدیگی خریطه بیچیمینده‌کی شکله ایشاره ائد‌رک،
"ارمنیستانین گۆونلیگینین تامین ائدیلمه‌سی قونوسوندا یاساللیغا وورغو ائدیلمه‌لیدیر. ارمنیستانین تورپاقلاری بودور. بو سرحدلردن باشقا امللریمیز اولمامالیدیر. چونکو بو سرحد خطلریندن باشقا هر هانسی بیر امل، بیزی ییخما فورصتی اولاراق، بیزیم قانونی مؤقعیتیمیزی پوزماق اوچون ایستیفاده ائدیله‌جک" دئدی.
آذربایجانلا باریش رآنلاشماسی گؤروشمه‌لرینین داوام ائتدیریلدیگینی ایفاده ائد‌ن پاشینیان، ایکی اؤلکه سرحدلرینین تعیین اولونماسی ایشلرینین باشباخان کؤمکچیلرینین باشقانلیق ائتدیگی کمیسیونلار طرفیندن ایجرا ائدیلدیگینی بیلدیررک، آذربایجانین ارمنیستاندان تئز زاماندا تحویلینی طلب ائتدیگی و آدینی وئردیگی کندلرین سووئتلر بیرلیگی دؤنمبنده و سونراسیندا هئچ اولمادیغینی ادعا ائتدی.
سرحد تعیین ائتمه ایشلرینین سؤزو گئدن کندلرین اولدوغو تاووش (توووز) بؤلگه‌سیندن باشلاماسینین احتیمال دیشی اولمادیغینی دئین پاشینیان، بؤلگه‌یه گئده‌رک وضعیتی یئرینده آراشدیراجاغینی سؤیله‌دی.
پاشینیان، کولکتیو گوونلیک آندلاشماسی تشکیلاتی قونوسوندا ایسه بو تشکیلات ایله ایلیشکیلرینی دوندوردوقلارینی، فعالیتلرینه قاتیلمادیقلارینی، تشکیلات باش کاتیبی کؤمکچیسی مقامینا هله ده آتاما ائتمه‌دیکلرینی خاطیرلاداراق، بونون سببینین تشکیلاتین ارمنیستانداکی مسئولیت بؤلگه‌سینه دایر سوالا جاواب وئرمه‌مه‌سی اولدوغونو قید ائتدی.
باشباخان پاشینیان، تشکیلاتدان گله‌جک جاوابین اؤلکه‌سینین گؤزلنتیلری ایله اوست اوسته دوشمه‌مه‌سی حالیندا ارمنیستانین تشکیلاتدان چکیله‌جگینی آنجاق بونون نه واخت اولاجاغینی بیلمه‌دیگینی ایفاده ائتدی.
