پاشینیان: ارمنیستان روسیانین متفیقی دئییل
"بیزه گؤره آلما-آتا بیلدیرگه‌سی بیزیم موستقیللیگیمیز و تورپاق بوتونلوگوموزون ضمانتیدیر و منطقی اولاراق عینی شئی اوکراینا اوچون ده گئچرلی اولمالیدیر"
ارمنیستان باشباخانی نیکول پاشینیان اؤلکه‌سینین، اوکراینا قونوسوندا روسیانین متفیقی اولمادیغینی سؤیله‌دی.
پاشینیان، "داها اؤنجه ده سؤیله‌دیگیم کیمی ارمنیستان اوکراینا قونوسوندا روسیانین متفیقی دئییل و بو بیزیم صمیمی دوروشوموزدور. بو وضعیته بیر شکیلده تأثیر ائده‌بیلمه‌دیگیمیز اوچون کدرلیییک. اوکراینا خالقی بیزیم اوچون قارداش خالقدیر. نانکورلوق ائده‌بیلمریک، ارمنیلر اوکراینادا اؤزلرینی یاخشی حس ائدیردی" دئیه دانیشدی.
پاشینیان آیریجا روسیا و اوکراینا دا داخیل اولماق اوزره اسکی سووئت سوسیالیست جمهوریتلر بیرلیگی جمهوریتلرینین بیر بیرلرینین دؤولت سرحدلرینی تانیدیقلارینی تصدیق ائد‌ن ۱۹۹۱ آلما-آتا بیاننامه‌سینین اؤنمینی خاطیرلاتدی.
پاشینیان سؤزلرینی، "بیزه گؤره آلما-آتا بیلدیرگه‌سی بیزیم موستقیللیگیمیز و تورپاق بوتونلوگوموزون ضمانتیدیر و منطقی اولاراق عینی شئی اوکراینا اوچون ده گئچرلی اولمالیدیر. چونکو بو سند هامیمیزی باغلار. بونو پوزساق هر شئیی پوزابیلریک دئمکدیر" دئیه داوام ائتدیردی.
ژوئن آییندا پاشینیان، ارمنیستانین اوکراینا قونوسوندا روسیانین متفیقی اولمادیغینی سی‌ان‌ان پریما نیوزا وئردیگی موصاحیبه‌ده ده ایفاده ائتمیشدی.
موصاحیبه‌ده پاشینیان، "بیز روسیانین اوکراینا ساواشیندا متفیقی دئییلیک. بو ساواش، بو چاتیشما بیزی قایغیلاندیریر چونکو دوغرودان بوتون قارشیلیقلی ایلیشکیلریمیزه تأثیر ائدیر. باتیدا بیزی روسیا ایله متفیق اولاراق گؤرورلر. روسیادا ایسه بیزیم اوکراینا ساواشیندا متفیقلری اولمادیغیمیزین فرقینده‌دیرلر. بو سببدن بو وضعیتده بیز کیمسه‌نین متفیقی دئییلیک و بو دا قیریلقان اولدوغوموز معناسینی وئریر" دئمیشدی.
فوریه باشیندا ارمنیستان دؤولت رادیوسونا وئردیگی موصاحیبه‌ده ده پاشینیان ایروانین عسگری امکداشلیق اوچون یئنی متفیقلر آختاردیغینی، چونکو اسکیسی کیمی روسیا ایله کیفایتلنه‌بیلمه‌یه‌جگینی سؤیله‌میشدی.
ژانویه آییندا پاشینیان ناتونون قافقاز و اورتا آسیا نماینده‌سی خاویر کولومینا ایله ارمنیستانین ناتو ایله امکداشلیغینی دانیشمیشدی.
