ایسرائیلین غزه‌یه سالدیریلاری داوام ائدیر
ایسرائیل گوجلرینین سالدیریلاریندا قتل ائدیله‌ن فیلیسطینلیلرین ساییسی ۱۱ مین ۵۰۰ نفره یوکسلدی
ایسرائیلین محاصره آلتینداکی غزه یولاغینا قارشی سالدیریلاری داوام ائدیر.
ایسرائیل گوجلرینین سالدیریلاریندا قتل ائدیله‌ن فیلیسطینلیلرین ساییسی ۱۱ مین ۵۰۰ نفره یوکسلدی.
خسته‌خانا و سیویل ساحه‌لره قارشی سالدیریلار آرتارکه‌ن، حماس و ایسرائیل گوجلری آراسیندا دا آغیر چاتیشمالار یاشانیر.
ایسرائیل اوردوسونون، محاصره آلتینداکی غزه یولاغینین فرقلی نقطه‌لرینه گئجه بویو تشکیل ائتدیگی سالدیریدا اؤلن و یارالانانلار اولدو.
فیلیسطین خبر آژانسی وفانین خبرینه گؤره، غزه یولاغینین قوزئیینده‌کی جبالیا سیغینماچی دوشرگه‌سینه "ایسرائیل ایشغال گوجلرینین گئرچکلشدیردیگی قیرغیندا" ان آز ۱۱ فیلیسطینلی اؤلدو، بعضیلری ده یارالاندی.
ایسرائیل ساواش اوچاقلاری و توپچو بیرلیکلری، غزه‌نین شیخ رضوان، تفاح و شجاعیه محله‌لرینه، یافا جاده‌سی، غزه شهری و نزاله بؤلگه‌سینه آتیش ائتدی.
ایسرائیلین، دیر البلح‌ده‌کی بریج سیغینماچی دوشرگه‌سی ایله غزه یولاغینین گونئیینده‌کی رفح شهرینده یئریندن ائدیلمیش بیر قروپ اینسانی هدف آلماسی نتیجه‌سینده اؤلن و یارالانانلار اولدو.
فیلیسطین خبر آژانسی وفانین خبرینه گؤره، "ایشغال گوجلرینین جنین دوشرگه‌سینده سلاحلی اینسانسیز هاوا آراجی(سیها) ایله تشکیل ائتدیگی سالدیریدا" ۳ فیلیسطینلی حیاتینی ایتیردی، ۲سی آغیر ۹ نفر یارالاندی.
شاهیدلردن آلینان بیلگییه گؤره ده ایسرائیل اوردوسونون اونلارجا عسگری آراج، بولدوزر، هلیکوپتر و سیهالارلا جنین شهری و دوشرگه‌سینه گئجه ساعاتلاریندان بری تشکیل ائتدیگی باسقین هله داوام ائدیر.
ایسرائیل اوردوسو شهره بیر چوخ ایستیقامتدن سالدیری تشکیل ائدرک جنین سیغینماچی دوشرگه‌سینی محاصره ائتدی.
جنین شهرینه اونلارجا عسگری آراجلا فرقلی نقطه‌لردن داخیل اولان ایسرائیل عسگرلری ابن سینا خسته‌خاناسینی محاصره آلتینا آلدی.
سوسیال مئدیادا دا بیر چوخ حساب ابن سینا خسته‌خاناسینی محاصره ائد‌ن ایسرائیل عسگرلرینین سلاح زورو ایله، عاجیل سرویسده چالیشان ساغلیقچیلاری اللری هاوایا قالدیریلمیش شکیلده چیخاردیب، چوخ ساییدا اینسانی گؤزآلتینا آلدیغی گؤرونتولری پایلاشدی.
فیلیسطین مخابرات شیرکتی، انرژی قایناقلارینین توکه‌نمه‌سی سببی ایله غزه یولاغیندا‌کی ثابت خط و جیب تلفونلاری ایله اینترنت خیدمتلرینین تامامیله کسیلدیگینی بیلدیردی.
فیلیسطین قیزیل آیی، ایسرائیل تانکلارینین محاصره آلتینداکی غزه یولاغینین قوزئیینده یئر آلان الاهلی باپتیست خسته‌خاناسینی محاصره ائتدیگینی و اکیپلرینین حرکت ائده‌بیلمه‌مه‌سی سببی ایله بؤلگه‌ده‌کی یارالیلارا چاتابیلمه‌دیکلرینی بیلدیردی.
غزه یولاغیندا‌کی حکومت، ایسرائیلین قوشاتدیغی شفا خسته‌خاناسیندا ۷ میندن چوخ یئریندن ائدیلمیش اینسان، خسته و ساغلیق پرسنلینین سو و یئمک اسکیکلیگی سببی ایله اؤلومله قارشی قارشییا اولدوغونو بیلدیردی.
لبنانداکی حزب‌الله حرکتینین، ایسرائیله عاید عسگری نقطه‌لره سالدیری تشکیل ائتدیگی ایفاده ائدیلدی.
حزب‌الله، ایسرائیل اوردوسونا عاید سرحدده‌کی عسگری نقطه‌لره سالدیریلار حاقیندا یازیلی بیر آچیقلاما یاییملادی.
آچیقلامادا، سرحدده‌کی ایسرائیلین مسکاف عام، جل العلام، بیاض بلیدا، یفتاح و مطله عسگری نقطه‌لرینه "اویغون سلاحلارلا" سالدیری گئرچکشدیریلدیگی قید ائدیلدی.
سالدیریدا بوتون نقطه‌لرین "تام اصابتله" وورولدوغو ایفاده ائدیله‌ن آچیقلامادا، ایسرائیلین جان ایتکینلری حاقیندا هر هانسی بیر بیلگییه یئر وئریلمه‌دی.
