ایران، آمریکالی ۵ محکومو بوراخاجاق
کنعانی: آمریکا حبس‌خانالاریندا توتوقلو اولان ۵ ایران وطنداشی، آمریکا وطنداشی ۵ توتوقلویا قارشیلیق بو گون سربست بوراخیلاجاق
ایران، آمریکا بیرلشمیش دؤولتلری وطنداشی ۵ محکومون بو گون سربست بوراخیلاجاغینی بیلدیردی.
ایران خاریجی ایشلر باخانلیغی سؤزچوسو ناصر کنعانی باشکند تهران‌دا تشکیل ائتدیگی هفته‌لیک مطبوعات توپلانتیسیندا، آمریکا ایله ایران آراسیندا ائدیلمه‌سی پلانلانان محکوم دییشیمینه باغلی آچیقلامالار وئر‌دی. کنعانی،
"آمریکا حبس‌خانالاریندا توتوقلو اولان ۵ ایران وطنداشی، آمریکا وطنداشی ۵ توتوقلویا قارشیلیق بو گون سربست بوراخیلاجاق" دئدی.
ایران وطنداشلارینین سربست بوراخیلمالاری دوروموندا هارا گئده‌جکلری قونوسونا باغلی کنعانی،
"ایکی وطنداش اؤز ایستک و آرزولارییلا ایرانا قاییدیر، بیر نفر اوچونجو بیر اؤلکه‌ده‌کی عائله‌سینین یانینا گئدیر، ایکی وطنداش دا آمریکا‌دا قالماق ایسته‌ییر" ایفاده‌لرینی ایشلتدی.
کنعانی، گونئی کره‌ده بلوکه ائدیله‌ن ایران وارلیقلارینین دا بو گون کؤچوروله‌جگینی سؤزلرینه علاوه ائتدی.
آمریکا و ایران مئدیاسیندا یئر آلان خبرلرده، ایرانین گونئی کره‌ده دوندورولموش ۶ میلیارد دلارینین سربست بوراخیلماسی قارشیلیغیندا، ایکی اؤلکه‌نین توتوقلو دییشیمی ائدجگی بیلیسی پایلاشیلمیشدی.
آغ ائو، ۱۰ آگوست‌دا، ایراندا توتوقلو ۵ آمریکا وطنداشینین حبس‌خانادان چیخاریلیب ائو حبسینه آلیندیغینی دوغرولامیشدی.
ایران خاریجی ایشلر باخان کؤمکچیسی و باش‌موذاکیره‌چی علی باقری ده آمریکا ایله یئریدیله‌ن توتوقلو دییشمینه باغلی موذاکیره‌لرده یاشانان گلیشمه‌لره دقت چکه‌رک، ایرانین دوندورولموش وارلیقلارینین و آمریکا‌دا توتوقلو اولان چوخ ساییدا ایران وطنداشینین سربست بوراخیلاجاغینی قید ائتمیشدی.
ایران مرکز بانکی باشقانی محمدرضا فرزین، ۱۲ آوگوست‌دا، گونئی کره‌ده دوندورولان وارلیقلارینین بلوکاژینین قالدیریلدیغینی آچیقلامیشدی.
