ایرانین ریاض ائلچیلیگی آچیلدی
ایرانین ریاض ائلچیلیگینین آچیلیش مراسیمینه خاریجی ایشلر باخان کؤمکچی‌سی علیرضا بیگد‌لی ده قاتیلدی
ایرانین سعودی عربیستان‌داکی ریاض ائلچیلیگی ۷ ایل آرادان سونرا یئنی‌دن آچیلدی.
ایران دؤولت تلویزیونونون خبرینه گؤره، ایرانین ریاض ائلچیلیگینین آچیلیش مراسیمینه خاریجی ایشلر باخان کؤمکچی‌سی علیرضا بیگد‌لی ده قاتیلدی.
سعودی عربیستان‌دا ۲ ژانویه ۲۰۱۶دا، آرالارین‌دا شیعه دین آدامی نمر النمرین ده اولدوغو ۴۷ نفر "ترور" سوچلاماسییلا اعدام ائدیلمیشدی.
اعداملارا تپکی وئره‌ن ایران‌لی مقاملارین آرخا آرخایا وئردیگی آچیقلامالارین آردین‌دان سعودی عربیستانین تهران ائلچیلیگی و مشهد شهرین‌ده‌کی کونسوللوق بیناسی، ایران‌داکی گؤستریچیلر طرفین‌دن یاندیریلمیشدی.
بو سالدیریلارین آردین‌دان سعودی عربیستان رهبرلیگی، ۳ ژانویه‌ده ایران ایله دیپلوماتیک ایلیشکیلرینی کسدیگینی بیلدیرمیشدی.
ریاض و تهران، ۷ ایل آرادان سونرا ۱۰ مارس‌دا پکن‌ده چین‌لی مقاملارین آراچیلیغی ایله دیپلوماتیک ایلیشکیلرین ایکی آی ایچین‌ده یئنی‌دن باشلادیلماسی قونوسون‌دا آنلاشمایا وارمیشدی.
ایران خاریجی ایشلر باخانی حسین امیرعبداللهیان ایله سعودی عربیستان‌لی قونومداشی فیصل بن فرحان دا ۶ آوریل‌ده پکن‌ده بیر آرایا گلمیش و ایکی اؤلکه ائلچیلیکلرینین یئنی‌دن آچیلماسی، ایکی اؤلکه آراسین‌داکی اوچوشلارین یئنی‌دن باشلادیلماسی و ویزالارین آسانلاشدیریلماسی قونوسون‌دا آنلاشمیشدی.
ایران، ۲۳ می‌ده خاریجی ایشلر باخان کؤمکچی‌سی علیرضا عنایتینین ریاض ائلچیی اولاراق تعیین ائدیلدیگینی آچیقلامیشدی.
