ایرانلا افغانیستان آراسیندا چاتیشمالار داوام ائدیر
چاتیشمالار سیراسین‌دا، ۲ ایران سرحد گؤزتچیسی ایله طالبان گوجلرین‌دن ۱ نفر حیاتینی ایتیردی
ایران-افغانیستان سرحدده یاشانان چاتیشمالار سیراسین‌دا، ۲ ایران سرحد گؤزتچیسی ایله طالبان گوجلرین‌دن ۱ نفر حیاتینی ایتیردی.
ایرانین یاری رسمی فارس خبر آژانسینین بؤلگه‌ده‌کی قایناقلارینا دایاندیردیغی خبرینه گؤره، ایرانین سیستان و بلوچستان ایالتینه باغلی هیرمند ائلچه‌سینده‌کی ساسولی پولیس بؤلمه‌سی یاخینلارین‌دا طالبانین سرحد گوجلری ایله ایران سرحد گؤزتچیلری آراسیندا چاتیشما چیخدی.
ایران رسمی آژانسی ایرنانین خبرینه گؤره ایسه سرحد گؤزتچیلری طرفین‌دن وئریلن آچیقلامادا، سرحدده‌کی چاتیشمالاردا ۲ ایران عسگرینین حیاتینی ایتیردیگی، ۲ نفرین ده یارالاندیغی ایفاده ائدیلدی.
چاتیشمالاردا طالبان گوجلرینه ده چوخ ساییدا ایتکی وئردیریلدیگی بیلدیریلدی.
طالبان گئچیجی حکومتینین ساوونما باخانلیغی ایسه ایران عسگرلرینین نیمروز ایالتینین کانگ ولوسوالیسینه باغلی سرحد بؤلگه‌سین‌ده آتیش ائتمه‌سینین، ایکی طرف آراسیندا چاتیشمالارا سبب اولدوغونو بیلدیردی.
طالبان ایچ ایشلری باخانلیغی سؤزچوسو عبدالنافع تکور دا توییتر حسابین‌دان وئردیگی آچیقلامادا، چاتیشما نتیجه‌سین‌ده هر ایکی طرف‌دن بیر نفرین حیاتینی ایتیردیگینی و چوخ ساییدا یارالینین اولدوغونو دئدی.
ایران ایله طالبان آراسیندا سون گونلرده هلمند چایی اوزرین‌ده‌کی سو پایلاشیمی قونوسون‌دا گرگینلیک یاشانیر.
طالبان رهبرلیگی، بؤلگه‌ده‌کی قوراقلیق سببی ایله هلمند چایی اوزرین‌ده‌کی کجکی سدی و کمال خان چایلارین‌دا سو میقدارینین آزالدیغینی و بونا گؤره ایرانا سو چاتمادیغینی ساووناراق، ایران ایسه تکنیک بیر هیئتین سدلره گئدرک بو وضعیتی تصدیق ائتمه‌سی لازیم اولدوغونو ایفاده ائدیر.
طالبانین افغانیستان‌دا ۲۰۲۱ده رهبرلیگه گلمه‌سینین آردین‌دان پاکیستان و ایران سرحد گوجلری زامان زامان طالبان گوجلریله چاتیشیر.
