تبریزده قیز اؤیرنجیلر زهرلندی
گؤرونتولرده، زهرلهنمه حادثهسینی ائشیدن آنا آتالارین اوخول قارشیسیندا توپلاندیغی، بیر آمبولانسین بورادا گؤزلهدیگی گؤرولدو
ایراندا تبریز، سنندج، اورمیه و کرج شهرلریندهکی بعضی اوخوللاردا زهرلهنمه حادثهلری یاشاندیغی ادعا ائدیلدی.
سوسیال مئدیادا پایلاشیلان گؤرونتولرده، تبریز شهرینین زعفرانیه سمتیده اولان آسمان اوخولو اؤیرنجیلرینین شیمیایی گازلا زهرلندیکلری ایرلی سورولدو.
گؤرونتولرده، زهرلهنمه حادثهسینی ائشیدن آنا آتالارین اوخول قارشیسیندا توپلاندیغی، بیر آمبولانسین بورادا گؤزلهدیگی گؤرولدو.
زهرلهنمه حادثهسینین آردیندان اوخول مودورونون اؤیرنجیلرین دیشاری چیخماسینا ایجازه وئرمهدیگی ایرلی سورولرکهن، آنا آتالارین دا اوشاقلارینین وضعیتینه دایر بیلگی آلابیلمهدیکلرینی ایفاده ائدرک تپکی وئردی.
یئنه سوسیال مئدیا ایستیفادهچیلری، پایلاشدیقلاری گؤرونتولرله سنندج شهریندهکی نسیبه اوخولو، باتی آذربایجانین اورمیه شهریندهکی فرزانگان اوخولو، البرز ایالتینین کرج شهریندهکی محمدباقر اوخولو ایله ملکزاده ابتدای اوخولو اؤیرنجیلرینین ده زهرلندیگینی ادعا ائتدی.
مسئول تشکیلاتلار، سؤزو گئدن اوخوللاردا نئچه نفرین زهرلندیگی یا دا زهرلهنمهنین قایناغینین نه اولدوغونا باغلی هله آچیقلاما وئرمهدی.
ایراندا ۳۰ نوامبر ۲۰۲۲دن بو یانا عمومیتله قیز اؤیرنجیلرین تحصیل آلدیغی اوخوللاردا توپلو زهرلهنمه حادثهلری یاشانیر.
بو آنا قدر ۲۵۰یه یاخین اوخولدا ۵ میندن چوخ اؤیرنجی زهرلهندی.
اؤیرنجیلرده تنفس چتینلیگی، اورک بولانماسی، باش آغریسی و عضولرده اویوشما کیمی علامتلر گؤرولور.
ایران ایچ ایشلری باخانلیغی اوخوللاردا توپلو زهرلهنمه حادثهلری ایله باغلانتیلی اولدوقلاری شوبههسی ایله ۱۰۰دن چوخ اینسانین گؤزآلتینا آلیندیغینی بیلدیرمیشدی.
