امیرعبداللهیان، لاوروولا دانیشدی
ایکی باخان؛ تورکیه، سوریه، ایران و روسیا آراسیندا ائدیله‌جک دؤردلو گؤروشمه قونوسوندا مشورت ائتدی
ایران خاریجی ایشلر باخانی حسین امیرعبداللهیان ایله روسیا خاریجی ایشلر باخانی سرگئی لاوروو، ایران-سعودی عربیستان آراسینداکی آنلاشما و سوریه ایله اوکراینا مؤوضوعلارینی اله آلدی.
ایران خاریجی ایشلر باخانلیغیندان وئریلن یازیلی آچیقلامایا گؤره، عبداللهیان، لاوروو ایله تلفن‌دا دانیشدی.
اؤلکه‌لری آراسینداکی هر طرفلی اوزون وعده‌لی امکداشلیق آنلاشماسینی دگرلندیره‌ن ایکی باخان؛ تورکیه، سوریه، ایران و روسیا آراسیندا ائدیله‌جک دؤردلو گؤروشمه قونوسوندا دا مشورت ائتدی.
اوکرایناداکی وضعیتله باغلی سون گلیشمه‌لرین ده دانیشیلدیغی تلفن تماسیندا عبداللهیان، اؤلکه‌سینین "اوکراینادا سیاسی حل و دیالوگا متمرکز اولما قونوسون‌داکی ایلکه‌لی گؤروشونو" تکرارلادی.
لاوروو دا ایران ایله سعودی عربیستان آراسیندا دیپلوماتیک ایلیشکیلرین یئنی‌دن باشلادیلماسینا دایر واریلان آنلاشمانی سئوینجله قارشیلادیقلارینی ایران‌لی قونومداشینا چاتدیردی.
روسیا خاریجی ایشلر باخانلیغیندان گؤروشمه‌یه باغلی وئریله‌ن آچیقلامایا گؤره ده ایکی باخان تلفن دانیشماسیندا، "روسیا ایله ایرانا قارشی تطبیق اولونان تک طرفلی غیر قانونی تحریملره باخمایاراق، ایکیلی تیجارت حجمینین رکورد سویه‌یه چاتماسیندان" ممنونیتینی دیله گتیردی.
بؤلگه‌سل و اولوسلارآراسی مؤوضوعلارین دا اله آلیندیغی تلفن دانیشماسیندا، داها آرتیق تماسلارین داوام ائتدیریلمه‌سی قونوسوندا آنلاشما اولدو.
