روسیا اوکراینانین الکترون کشفیات مرکزینی ووروب

روسیا ساوونما ناظیرلیگی اوکراینا اوردوسونون الکترون کشفیات مرکزینی و خصوصی عملیات مرکزینی ووردوغونو بیلدیریب.

ناظیرلیگین سؤزچوسو ایگور کوناشنکوو بیلدیریب کی، روسیا قوشون‌لاری اوکراینایا هوجوم‌لارینی داوام ائتدیریر.

روسیا سلاحلی قوه‌لری‌نین اؤز عملیات تاکتیک و حربی هاوا قوه‌لری ایله راکت و توپچو بیرلشمه‌لری ایله اوکراینا اوردوسونون آتیش موضع لری، حربی حیسه‌لری و تکنیکی ماشین‌لاری‌نین یئرلشدیگی اراضی‌لره ضربه‌لر ائندیردیگینی قئید ائدن کوناشنکوو "اوکراینا سلاحلی قوه‌لری‌نین کیئو بؤلگه‌سینده برواری-ده‌کی الکترون کشفیات مرکزی محو ائدیلیب. خملنیتسکی شهری یاخینلیغیندا "باتی" خصوصی عملیات مرکزی ده ائله‌جه" ایفاده‌لریندن ایستیفاده ائدیب.

کوناشنکوو بیر ایلی آرخادا بوراخان ساواشدا اوکراینا اوردوسونا عایید 390 اوچاق، 211 هلیکوپتر، 3 مین 248 پیلوت‌سوز اوچوش آپاراتی، 406 هاوا هوجومون‌دان ساوونما راکت سیستمی، 8 مین 58 تانک و زره لی آراج، 1045 چوخ لوله لی راکت آتارلار، 4 مین 228 هویتزر و خمپاره، 8 مین 574 خصوصی حربی واسیطه ووردوق‌لارینی دیله گتیریب.

اوکراینا باش قرارگاهی روسیانین 5 ایستیقامتده 81 هوجومونون دفع ائدیلدیگینی بیلدیریب.

باش قرارگاه رئیس‌لیگی‌نین آچیقلاماسیندا آیریجا "دوشمن، دؤولتیمیزین کریتیک آلت یاپی سینی محو ائتمه‌یه چالیشیر، هوجوم‌لاری داوام ائتدیریر، سیویل تاسیس لری، منزیل‌لری آغیر سلاح‌لارلا هدفه آلیر" ایفاده‌سیندن ایستیفاده ائدیلیب.

آچیقلامادا روسیانین سو-25 تیپ‌لی اوچاغی‌نین وورولدوغو دا بیلدیریلیب.