ایران‌دان اینگیلتره و آوروپا بیرلیگی اؤلکه‌لرینه تحریم
۱۳ قوروم و ۲۳ شخصه قارشی تحریملرین "ویزا قاداغاسی، ایرانا گیریشلرینین قاداغان ائدیلمه‌سی و ایران‌داکی مال وارلیقلارینا ال قویولماسینی دا احتیوا ائتدیگی" بیلدیریلدی
ایران، اینگیلتره و آوروپا بیرلیگی اؤلکه‌لرین‌ده‌کی ۱۳ قوروم ایله ۲۳ اوست سویه شخص حاقین‌دا تحریم قراری وئردی.
ایران خاریجی ایشلر باخانلیغینین اینترنت سایتیندا یاییملانان آچیقلامادا، سؤزوگئدن تحریم قرارینین، ایلگیلی مقاملارین اونایلاری دوغرولتوسوندا و مقابله بالمثل اصلینه گؤره آلیندیغی ایفاده ائدیلدی.
آچیقلامادا، تحریمنین سببلری آراسیندا "ترورو و تروریست قروپلاری دستکله‌مک، ایران خالقینا قارشی ترور ائیلملرینی و خشونتی قیشقیرتماق و تشویق ائتمک، ایرانین ایچ ایشلرینه قاریشماق، ایران حاقین‌دا یالان و یانلیش بیلگیلر یایماق ایله اؤلکه‌یه قارشی تحریملرین آرتدیریلماسینا قاتقی وئرمک" کیمی سببلر ساییلدی.
آچیقلامادا، سؤزو گئدن ۱۳ قوروم و ۲۳ شخصه قارشی تحریملرین "ویزا قاداغاسی، ایرانا گیریشلرینین قاداغان ائدیلمه‌سی و ایران‌داکی مال وارلیقلارینا ال قویولماسینی دا احتیوا ائتدیگی" بیلدیریلدی.
تحریملره تابع اولان قوروملار لیستینده، "ناتو آوروپا متفیق یوکسک قوموتانلیغی، آلمان اوردوسو میللی قوموتانلیغی و عمومی اوزای عملیاتلاری بؤلومو، آلمان سلاح شیرکتی کراوس مافای وگمان آدلی قوروم و قورولوشلار یئر آلدی.
تحریم تطبیق ائدیلن شخصلر لیستینده ایسه "فرانسادان قادین-کیشی برابرلیگیندن سوروملو باخان ایزابل روم، فرانسادا صنایعدن مسئول باخان رولان لکور، آلمان پارلمانی عضوو رودریش کریزوتر، آلمان پارلمانی عضوو رناتا آلت، اینگیلتره‌دن کرالیت دنیز گوجلری هاوا امرکزی باشچیسی استوارت ایروین و یئنه اینگیلتره‌دن بیرلشمیش دنیز گوجلری قوموتان کؤمکچیسی فیلیپ دنیس کیمی آدلار دقت چکدی.
آوروپا بیرلیگی، ایراندا گنج بیر قادینین ۱۶ سپتامبردا اؤلوموندن سونرا باشلایان گؤستریلره امنیت گوجلرینین موداخیله‌سی و گؤستریچیلره وئریله‌ن اعدام جزالاری سببی ایله ۲۰ فوریه‌ده ایران مدنیت و ارشاد باخانی محمد مهدی اسماعیلی ایله تحصیل باخانی یوسف نورینین دا آرالارین‌دا اولدوغو ۳۲ نفر ایله ۲ قورولوشا تحریم تطبیق ائتمه قراری آلمیشدی.
تحریملر، لیستینده‌کیلرین وارلیقلارینین دوندورولماسینی، آوروپا بیرلیگی اؤلکه‌لرینه سیاحت قاداغاسینی، بو شخص و قورولوشلارا مالی دستگین انگللنمه‌سینی احتیوا ائدیر.
