زلنسکی:"روسیا اوکراینانین خرسون شهرینی 16 دفعه‌دن چوخ هدفه آلیب"

اوکراینا پرزیدنتی ولودیمیر زلنسکی بیان ائدیب کی، روسیا اوردوسو دسامبرین 15-ده اوکراینانین خرسون شهرینی 16 دفعه‌دن چوخ هدفه آلیب.

زلنسکی "تلگرام" حسابیندا گونده‌لیک ویدئو پای‌لاشیمیندا قیرمیزی خاچ (صلیب سرخ) یاردیم منطقه‌سینده کؤنول‌لو اولا‌راق خیدمت گؤسترن بیر قادین‌ین روسیا اوردوسونون خرسون شهرینه هوجومو نتیجه‌سینده حیاتینی ایتیردیگینی بیلدیریب.

ولودیمیر زلنسکی "روسیا گون عرضینده خرسونو 16 دفعه‌دن چوخ بومبالادی. بو بیر گونده اولوب و بو هوجوم‌لار هر گون ائدیلیر" دئییب.

دونباس بؤلگه‌سینده شدت‌لی توققوشما‌لارین داوام ائتدیگینی و بورا‌داکی یاشاییش منطقه‌لرینه ائدیلن هوجوم‌لاردا سیویل آلت یاپی‌نین هدف آلیندیغینی قئید ائدن زلنسکی روسیا قوه‌لری‌نین اوکراینا اوردوسونا قارشی اوغورسوزلوغا دوچار اولدوغونو بیلدیریب.

روسیانین یاراتدیغی داغینتی‌لارین دایاندیریلماسی‌نین واجیب‌لیگینی دیله گتیرن زلنسکی هوجوم‌لاری دایاندیرماغین یگانه یولونون روسیا اوردوسونون اوکراینا اراضی‌سیندن چیخارماق اولدوغونو وورغولاییب.

اوکراینا لیدری دسامبرین 15-ده آوروپا بیرلیگی اؤلکه‌لرینی فوریه‌نین 24-دن بری‌دیر داوام ائدن روسیانین هوجوم‌لاری نتیجه‌سینده انرژی آلت یاپیسینا جدی زیان ووران اوکراینایا طبیعی گاز و الکتریک انرژی‌سی‌نین آلینماسیندا دستکلمه‌یه دعوت ائدیب.