گوترش "باریش" چاغیریشی ائدیب

بیرلشمیش میللت‌لر تشکیلاتی‌نین (بمت) باش کاتیبی آنتونیو گوترش 6 آیدیر روسیانین ایشغا‌لی آلتیندا اولان اوکراینانین 31-جی موستقیل‌لیک گونونده "باریش" چاغیریشی ائدیب.

آنتونیو گوترش بمت تهلوکه‌سیزلیک شوراسینداکی چیخیشیندا بیان ائدیب کی، اوکراینا خالقی‌نین احتیاج دویدوغو "باریش درحال" الده ائدیلمه‌لی‌دیر.

آنتونیو گوترش چیخیشیندا فوریه‌نین 24-ده باشلایان روسیا-اوکراینا محاربه‌سینه توخونا‌راق دئییب:

"بو معنا‌سیز ساواشین نتیجه‌لری اوکراینا‌دان چوخ-چوخ اوزاق‌لاردا حیس اولونور".

گوترش وورغولاییب کی، روسیا-اوکراینا ساواشی موناقیشه‌لردن، برابرسیزلیک‌دن، ساغلیق پروبلئم‌لریندن، پاندمی سونراسی اقتصادیات‌دان و ایقلیم بحرانییندان بئزمیش قلوبال سیستمده یئنی ضعیف‌لیک‌لری اورتایا قویدو.

ارزاق، گوبره و یانا‌جاق قیمت‌لرینده‌کی سرعت‌لی آرتیمین دونیادا میلیون‌لارلا اینسانی یوخسوللوغا سوروکله‌ین، آجلیق و قیدا چاتیشمازلیغینی آرتیران قلوبال بحرانا سبب اولدوغونو قئید ائدن باش کاتیب گوبره بازاریندا تارازلیق تامین ائدیلمه‌دیکجه 2023-جو ایلده کیفایت قدر ارزاق محصولونون اولمایاجاغینی بیلدیریب.