اوکراینا:" روسیا اوردوسونون دونتسک ویلایتینده هوجوم‌لاری‌نین قارشی‌سی آلینیب"

اوکراینا باش قرارگاهی روسیا اوردوسونون دونتسک ویلایتینده هوجوم‌لاری‌نین قارشی‌سی‌نین آلیندیغینی آچیقلاییب.

1870160
اوکراینا:" روسیا اوردوسونون دونتسک ویلایتینده هوجوم‌لاری‌نین قارشی‌سی آلینیب"

اوکراینا باش قرارگاهی روسیا اوردوسونون دونتسک ویلایتینده هوجوم‌لاری‌نین قارشی‌سی‌نین آلیندیغینی آچیقلاییب.

اوردو سون 24 ساعاتدا باش وئرن قارشیدورما‌لار و روسیا اوردوسونون ایتکی‌لری ایله باغلی آچیقلاما وئریب.

آچیقلامایا گؤره، روسیا اوردوسو اساساً دونتسک بؤلگه‌سینده اولماقلا 400 عسگرینی ایتیریب.

فوریه‌نین 24-دن آوقوستون 19-دک اوکراینا-دا عمومی‌لیکده 44.700 روسیا عسگری ضررسیزلشدیریلیب.

بو مدتده روسیایا مخصوص 234 ساواش اوچاغی، 197 هلیکوپتر، 1899 تانک، 4 مین 195 زره‌لی آراج ، 1016 توپ، 266 راکت آتار و 141 هاوا هوجومون‌دان ساوونما سیستمی محو ائدیلیب.

آچیقلامادا روسیا قوه‌لری‌نین 3130 اتومبیل، 15 گمی، یونگول سرعت‌لی قاییق و 795 پیلوت‌سوز اوچوش آپاراتینی ایتیردیگی، روسیا طرفیندن آتیلان 190 قانادلی راکتین ده اوکراینا هاوا هوجومون‌دان ساوونما بؤلمه‌لری طرفیندن وورولا‌راق محو ائدیلدیگی بیلدیریلیب.

روسیا ساوونما ناظیرلیگی‌نین مارسین 25-ده وئردیگی آچیقلامادا اوکراینادا 1351 روس عسگری‌نین اؤلدوگو آچیقلانیب، لاکین سونرا‌دان ایتکی‌لرله باغلی معلومات‌لار یئنی‌لنمه‌ییب.

اوکراینا باش قرارگاهی‌نین دیگر بیاناتیندا دونتسک بؤلگه‌سینده قارشیدورما‌لارین شدتلندیگی، لاکین بوتون هوجوم‌لارین اوکراینا اوردوسو طرفیندن قارشی‌سی‌نین آلیندیغی بیلدیریلیب.

دونتسک والیسی پاول کریلنکو روسیا اوردوسونون هوجوم‌لاری نتیجه‌سینده سون 24 ساعاتدا 5 سیویل وطنداشین اؤلدوگونو آچیقلاییب.

دنیپروپتروفسکا والیسی والنتین رزنیچنکو روسیا اوردوسونون راکت هوجومو نتیجه‌سینده 1 سیویل شخصین هلاک اولدوغونو، 1 اوشاغین ایسه یارالاندیغینی آچیقلاییب.

خارکوو والیسی اولگ سینگوبوو دا سحر ساعات‌لاریندا روسیا اوردوسونون آتدیغی ان آزی 5 راکتین شهره دوشدوگونو، تحصیل موسسه‌لرین‌دن بیرینده محافظه‌چی اولان قادینین حیاتینی ایتیردیگینی بیلدیریب.

دیگر طرف‌دن، اؤتن گون روسیا اوردوسونون خارکوودا حیاتا کئچیردیگی راکت هوجوموندا 10 نفرین حیاتینی ایتیردیگی اوچون ماتم اعلان ائدیلیب.



ایلگیلی‌لی خبرلر