رئیسی-لاوروو گؤروشمه‌سیندن آیرینتیلار

رئیسی: امکداشلیق و بیرگه حرکتین گوجلندیریلمه‌سی، آمریکانین موستقیل اؤلکه‌لره قارشی اقتصادی تحریملرینه و تک طرفلیلیگینه قارشی موثر استراتژیدیر

1847217
رئیسی-لاوروو گؤروشمه‌سیندن آیرینتیلار

ایران جمهورباشقانی ابراهیم رئیسی و روسیانین خاریجی ایشلر باخانی سرگئی لاوروو، ایکی اؤلکه آراسیندا امکداشلیغین گوجلندیریلمه‌سینی موذاکیره ائتدی.

ایرانین رسمی خبر آژانسی ایرنایا گؤره، ابراهیم رئیسی، رسمی دعوت ایله باشکند تهران‌دا اولان روسیا خاریجی ایشلر باخانی لاوروو ایله گؤروشدو.

رئیسی و لاوروو ایکی‌لی ایلیشکیلر، بؤلگه‌سل و اولوسلارآراسی مسئله‌لر حاقیندا گؤروش آلیش وئریشی ائتدی.

جمهورباشقانی رئیسی، اؤلکه‌سی ایله روسیا آراسیندا ائدیلن دانیشیقلار و توپلانتیلارین ایکی اؤلکه‌نین یئنی استراتژیک امکداشلیق دؤورونو شکیللندیرمه قونوسونداکی جدی ایراده‌سینی گؤستردیگینی سؤیله‌دی.

رئیسی،

"امکداشلیق و بیرگه حرکتین گوجلندیریلمه‌سی، آمریکانین موستقیل اؤلکه‌لره قارشی اقتصادی تحریملرینه و تک طرفلیلیگینه قارشی موثر استراتژیدیر" دئدی.

اوکراینادا باش وئره‌ن سون حادثه‌لره دقت چکه‌ن رئیسی، ساواشین تئزلیکله بیتیریلمه‌سینین اؤنمینی و اؤلکه‌سینین دیپلوماتیک حل اوچون کؤمک ائتمه‌یه حاضر اولدوغونو وورغولادی.

ناتونون باتی آسیا، قافقاز و اورتا آسیا کیمی دونیانین موختلیف بؤلگه‌لرینده "یاییلماچی سیاست" یوروتدوگونو ادعا ائدرک بونا قارشی چیخیلماسی لازیم اولدوغونو قید ائدن رئیسی،

"بو چاتیشمالارین یارانماسیندا آمریکا و ناتو تخریباتلارینین رولو اوینادیغینا شبهه‌م یوخ" ایفاده‌سینی ایشلتدی.

روسیانین خاریجی ایشلر باخانی لاوروو دا تهران-موسکوا امکداشلیغینین اقتصاد داخیل اولماقلا چئشیدلی بعدلاری حاقیندا دیرلندیرمه‌لر وئردی. لاوروو، روسیانین ایرانلا امکداشلیغینی استراتژیک سویه‌یه داشیماغا حاضر اولدوغونو بیلدیردی.

روسیالی باخان، ایرانین شانگهای امکداشلیق تشکیلاتینا عضولویونه ده توخوناراق، اؤلکه‌سینین ایرانین بؤلگه‌سل و اولوسلارآراسی تشکیلاتلارداکی رولونون گئنیشلندیریلمه‌سینه دستگینی تکرارلادی.



ایلگیلی‌لی خبرلر