زلنسکی: روسیا ۲۰۰ میندن چوخ اوکراینالی اوشاغی قاچیردی
"بو سوچ سیاستینین آماجی یالنیز اینسانلاری اوغورلاماق دئییل، قاچیرتدیغی اینسانلارا اوکراینانی اونوتدورماق و گئری قاییتمالارینا انگل اولماق"
اوکراینا دؤولت باشقانی ولودیمیر زلنسکی، روسیانین ۲۰۰ میندن چوخ اوکراینالی اوشاغی قاچیردیغینی سؤیله‌دی.
روسیانین ۲۴ فوریه‌ده اوکراینایا قارشی باشلاتدیغی ساواش داوام ائدرکن، زلنسکی یئنی بیر آچیقلامادا،
"روسیا هم بؤیوکلری، هم ده اوشاقلاری زورلا آپاریر. بو، روسیانین ان آغیر ساواش سوچلاریندان بیریدیر. روسیا ساواشین باشلایندان بری یئتیم‌خانادا قالان و آنا-آتاسیندان آییردیغی توپلام ۲۰۰ میندن چوخ اوکراینالی اوشاغی قاچیرتدی" ایفاده‌لرینی ایشلتدی.
روسیانین بو اوشاقلاری یئرین‌دن-یوردون‌دان دیدرگین سالدیغینی و اونلاری اؤزللیکله اوجقار بؤلگه‌لره یئرلشدیردیگینی دیله گتیره‌ن ولودیمیر زلنسکی،
"بو سوچ سیاستینین آماجی یالنیز اینسانلاری اوغورلاماق دئییل، قاچیرتدیغی اینسانلارا اوکراینانی اونوتدورماق و گئری قاییتمالارینا انگل اولماق" دئدی.
اؤته طرف‌دن، زلنسکی،
"ایشغالچیلارین سالدیریلاری نتیجه‌سینده ساواش باشلایاندان بو یانا ۶۸۹ اوشاق یارالاندی. بو رقم یالنیز بیزیم معین ائده‌بیلدیکلریمیزدیر. حاضردا ایشغال ائدیلن بؤلگه‌لردن گلن بوتون بیلگیلر الیمیزده یوخدور" آچیقلاماسینی وئردی.
