طالبان، ۴۳۵۰ عضوونون وظیفهسینه سون وئردی
ایشدن چیخاریلانلار ایله طالبان عضولرینین ساییسینین نه قدر آزالدیغی هلهلیک بللی دئییل
افغانیستاندا طالبانین گئچیجی حکومتی، ۴۳۵۰ عضوونون وظیفهسینه سون وئردی.
طالبان گئچیجی حکومتینین ساوونما باخانلیغی صفلری تمیزلمه کمیسیونو باشقانی لطفالله حکیمی مطبوعاتا وئردیگی آچیقلامادا، طالبانین آدیندان و صلاحیتلریندن سوءایستیفاده ائدن طالبان عضولرینین ایشدن چیخاریلماسی پروسهسینین باشا چاتدیغینی بیلدیردی.
سون ۵ آیدا ۴۳۵۰ طالبان عضوونون ایشدن چیخاریلدیغینی ایفاده ائدن حکیمی، اونلاردان ۱۳۵نین قانونی یاشا چاتمامیش اوشاقلار اولدوغونو بیلدیردی.
حکیمی، بو یوللا طالبان صفلرینین پیس اینسانلاردان تمیزلندیگینی بیلدیردی.
ایشدن چیخاریلان طالبان عضولری آراسیندا داعش ترور هؤرگوتو ایله باغلانتیسی اولانلارین اولدوغونو بیلدیرهن حکیمی، اونلارین دا محکمهیه گؤندریلدیگینی وورغولادی.
سؤزوگئدن شخصلرین ایشدن چیخاریلماسی ایله طالبان عضولرینین ساییسینین نه قدر آزالدیغی هلهلیک بللی دئییل.
دیگر یاندان، طالبان گئچیجی حکومتینین یئنی اوردو قورماق اوچون چالیشمالاری داوام ائدیر.
بونونلا باغلی طالبان گئچیجی حکومتی ساوونما باخانلیغی ۱۰دسامبردا یئنی اوردو قورماغا باشلادیغینی آچیقلامیشدی.