تورکیه ایله ایران آراسیندا گوونلیک آنلاشماسی
"سوءقصدچیلرین ایران و تورکیه ایلیشکیلرینده پروبلئم ایجاد ائتمهسینه ایجازه وئرمهیهجییک"
تورکیه ایله ایران آراسیندا گوونلیک ساحهسینده امکداشلیق آنلاشماسی ایمضالاندی.
رسمی گؤروشمهلر اوچون ایرانین باشکندی تهرانا گئدن ایچ ایشلری باخانی سلیمان سویلو و قونومداشی احمد وحیدی آراسیندا ائدیلهن ایکیلی و هئیتلر آراسی گؤروشمهلرین آردیندان آنلاشما مموراندومو ایمضالاندی و اورتاق مطبوعات آچیقلاماسی ائدیلدی.
سویلو دانیشماسیندا،
"پکاکا ترور هؤرگوتو و بوتون ترور هؤرگوتلری ایله موباریزهده بیرلیکده اورتاق بیر ایراده سرگیلهییریک. بیر چوخ ایش قروپوموز وار و بو، ایکی اؤلکهنین طلبلری ایله دینامیکلرینی اورتایا قویموشدور. بو گون بیر دفعه داها ترورلا موباریزه قونوسونداکی عزمیمیزی و موباریزهدهکی بیرلیگیمیزی تصدیق ائتدیک" ایفادهلرینی ایشلتدی.
افغانیستاندا سون دؤورده میدانا گلن حادثهلر سونراسی قاچاق کؤچون حرکتلهنمهسینه قارشی ایللردن بری اورتاق اولاراق داوام ائتدیریلهن ایشلری و قاچاق کؤچله موباریزه قونوسونو بیر دفعه داها اله آلدیقلارینی دیله گتیرهن سویلو، باخانلیقلار آراسینداکی امکداشلیغی فرقلی ساحهلرده گئنیشلهدهجک آنلاشما ایمضالادیقلارینی سؤیلهدی.
وحیدی ده، تورکیه و ایران آراسینداکی ایلیشکیلرده ایکی اؤلکه خالقینین چیخارینا خیدمت ائدجک داها درین یئنی بیر دؤور باشلایاجاغینی ایفاده ائدرک،
"سوءقصدچیلرین ایران و تورکیه ایلیشکیلرینده پروبلئم ایجاد ائتمهسینه ایجازه وئرمهیهجییک" دئیه دانیشدی.
ایمضالانان آنلاشما ایکی اؤلکه آراسینداکی گوونلیک امکداشلیغینین آرتیریلماسی و گلیشدیریلمهسینی هدفلهییر. آنلاشما، سرحد بؤلگهلری باشدا اولماق اوزره ایکی اؤلکهنی ماراقلاندیران هر جور ترور و یاسادیشی حرکتلرین اؤنلهنمهسی و بو ایستیقامتده ایجرا ائدیلهن هر جور انتظامی فعالیتین قارشیلیقلی اولاراق گلیشدیریلمهسینی اؤن گؤرور.