شن‌توپ، رئیسی ایله گؤروشدو
مصطفی شن‌توپ، ایرانین ۸.جی جمهورباشقانی ابراهیم رئیسی ایله گؤروشمه‌سینین آردین‌دان تورک مطبوعات منسوبلارینا دانیشدی
تورکیه بؤیوک ملت مجلسی باشقانی مصطفی شن‌توپ، ایرانین باشکندی تهران‌دا ایرانین ۸.جی جمهورباشقانی ابراهیم رئیسی ایله گؤروشدو.
گؤروشمه‌یه، عدالت و قالخینما پارتیسی باشقان وکیلی نومان قورتولموش، تورکیه-ایران دوستلوق قروپو باشقانی و آک پارتی وان ملت وکیلی عثمان نوری گول‌آچار و آک پارتی کوتاهیا ملت وکیلی اسحاق گازائل ده قاتیلدی.
مصطفی شن‌توپ، ایرانین ۸.جی جمهورباشقانی ابراهیم رئیسی ایله گؤروشمه‌سینین آردین‌دان تورک مطبوعات منسوبلارینا وئردیگی آچیقلامادا،
"سایین جمهورباشقانیمیز رجب طیب اردوغانین سلاملارینی چاتدیردیق. (رئیسینین جمهورباشقانلیغینین) ایران خالقی اوچون خیرلر گتیرمه‌سینی آرزو ائد‌رک، اؤزلرینه وظیفه‌لرین‌ده باشاریلار دیله‌دیک" دئدی.
شن‌توپ آیریجا تورکیه-ایران یوکسک سویه‌لی امکداش‌لیق شوراسینین گله‌جک‌ده‌کی ییغینجاغینین ایکی اؤلکه آراسین‌داکی امکداشلیغین ایرلیله‌دیلمه‌سی یولون‌دا تأثیرلی بیر آددیم اولماسی آرزوسونو دیله گتیردی.
آک پارتی باشقان وکیلی قورتولموش دا جمهورباشقانی اردوغان و آک پارتینین خیرلی اولسون مئساژینی رئیسییه چاتدیردیقلارینی ایفاده ائد‌رک،
"تورکیه ایله ایران ایلیشکیلرینین یئنی دؤورده داها دا آرتیریلماسی آرزوموزو دیله گتیردیک. تورکیه-ایران اقتصادی ایلیشکیلرینین هر ایکی اؤلکه اوچون ده آرتماسینین فایدالی اولاجاغینی وورغولادیق" دئدی.
رئیسی ده گؤروشمه‌ده ایران ایله تورکیه آراسین‌داکی ایلیشکیلرین قونشولوق ایلیشکیلرین‌دن اؤته اولدوغونو ایفاده ائد‌رک،
"اورتاق اینانجلار، ایکی اؤلکه خالقینی بیر بیرینه چوخ یاخینلاشدیرمیشدیر. ایرانین یئنی خاریجی سیاستی دوست و قارداش تورکیه ایله ایلیشکیلرین مختلف ساحه‌لرده گئنیشلدیلمه‌سی‌دیر. تهران و آنکارا، ایلیشکی‌لری هر ساحه‌ده ایرلیله‌تمک اوچون بیر چوخ اویغون ظرفیته صاحبدیر. ایلیشکیلرین سویه‌سینین یوکسلدیلمه‌سی، ایکی اؤلکه آراسین‌داکی امکداش‌لیغی بؤلگه‌سل و اولوسلارآراسی ساحه‌ده داها ائتکیلی بیر شکیلده ایر‌لی آپارابیلر" دئدی.
قونشولوق سیاستینین یئنی حکومتین اؤنجه‌لیکلری آراسین‌دا اولاجاغینی دیله گتیره‌ن رئیسی،
"قونشولوق سیاستینین باشاریسی، ایران ایله تورکیه آراسین‌داکی چوخ طرفلی ایلیشکیلرین درینلشدیریلمه‌سینه و گلیشدیریلمه‌سینه باغلی‌دیر" ایفاده‌لرینی ایشلتدی.
شن‌توپ و برابرین‌ده‌کی هئیت، رئیسینین آند ایچمه مراسیمینه قاتیلماق اوچون ایران‌دادیر.
