۵۹۲ نفر‌دن یالنیز ۷ نفره نامیزدلیک ایجازه‌سی چیخدی
اسکی جمهورباشقانی محمود احمدی‌نژاد، اسکی مجلس باشقانی علی لاریجانی و جمهورباشقانی بیرینجی کؤمکچیسی اسحاق جهانگیرینین جمهورباشقانلیغی نامیزدلیگی وتو ائدیلدی
ایران‌دا ۱۸ ژوئنده ائدیله‌جک جمهورباشقانلیغی سئچیمینه قاتیلماق اوچون مراجعت ائدن ۵۹۲ نفر‌دن یالنیز ۷ نفره نامیزدلیک ایجازه‌سی چیخدی.
ایران رسمی آژانسی ایرناین خبرینه گؤره، آنایاسا قورویوجولار شوراسی سؤزچوسو عباس علی کدخدایی، نامیزدلرین مراجعت نتیجه‌لریله باغلی،
"جمهورباشقانلیغی سئچیمینه قاتیلماق ایسته‌یه‌نلردن یالنیز ۷ نامیزد، شورا طرفین‌دن اونایلاندی" دئدی.
سئچکیلرده نامیزد اولماق ایسته‌یه‌نلرین رژیمه باغلیلیغی ایله سیاسی، اخلاقی و دینی محکوملوقلارینی آراشدیران شورانین، تصدیقلنه‌ن آدلاری ایچ‌ایشلری باخانلیغینا چاتدیردیغینی بیلدیرن کدخدایی، نامیزدلرین باخانلیق طرفین‌دن آچیقلاناجاغینی ایفاده ائتدی.
کدخدایی، آدایلیغی تصدیقلنه‌ن آدلاری آچیقلاماسا دا یاری رسمی فارس خبر آژانسی، محافظه‌کار کیملیکلری ایله بیلینه‌ن یارغی ارکی باشقانی ابراهیم رئیسی، اسکی سپاه اوردوسو باشچیسی و نظامین مصلحتینی تشخیص شوراسی باش کاتیبی محسن رضایی، اسکی ملی گوونلیک یوکسک شوراسی باش کاتبی و نوکلئر باش‌مذاکره‌چی سعید جلیلی، ملت وکیلی امر حسین قاضی‌زاده هاشمی و اسکی ملت وکیلی علی رضا زاکانی‌یه نامیزدلیک ایجازه‌سی وئریلدیگینی بیلدیردیردی.
اصلاحاتچی کیملیگی ایله تانینان آدلاردان ایسه اسکی جمهورباشقانی کؤمکچیسی و اسکی اصفهان والیسی محسن مهر علیزاده ایله مرکز بانکی باشقانی عبدالناصر همتینین نامیزدلیک ایجازه‌سی آلدیغی ایفاده ائدیلدی.
ایرانین یاری رسمی آژانسی فارسا گؤره ایسه، اسکی جمهورباشقانی محمود احمدی‌نژاد، اسکی مجلس باشقانی علی لاریجانی و جمهورباشقانی بیرینجی کؤمکچیسی اسحاق جهانگیرینین جمهورباشقانلیغی نامیزدلیگی وتو ائدیلدی.
