ایران مجلیسی قارشیسیندا اعتراض
ایرانین بعضی شهرلرینده توپلاشان اینسانلار اعتراض گؤستریسی تشکیل ائتدی
ایرانین بعضی شهرلرینده توپلاشان اینسانلار تهران و پکن آراسیندا ایمضالانان ۲۵ ایللیک امکداشلیق آنلاشماسینا اعتراض ائتدیلر.
سوسیال مئدیاداکی پایلاشیملارا گؤره، ایران پارلمانینین قارشیسینا توپلاشان ۲۰۰ نفره یاخین تهرانلی، تهران و پکن رهبرلیگی آراسیندا ایمضالانان ۲۵ ایللیک امکداشلیق آنلاشماسینین لغو ائدیلمهسینی ایستهدی.
اعتراضچیلار "ایران ساتیلیق دئییل"، "وطنی ساتانلارا اؤلوم"، "ساواشاجاییق، اؤلهجییک و ایرانی گئری آلاجاغیق" شعارلاری سسلندیردیلر.
البرز و اصفهان ایالتلرینده ده والیلیک قارشیسیندا توپلانان وطنداشلار آنلاشمایا اعتراض ائتدیلر.
داشینان پلاکاردلاردا "چین، ایراندان چیخ"، "آنلاشمانین لغو ائدیلمهسینی ایستهییریک" ایفادهلرینین یازیلدیغی گؤرولدو.
آیریجا، استرالیانین سیدنی شهرینده یاشایان ایرانلیلار چین کونسوللوغو قارشیسیندا آنلاشمایا اعتراض ائتدیلر.
هفته سونو رسمی دانیشیقلار آپارماق اوچون تهرانا گئدن چین خاریجی ایشلر باخانی وانگ یی، ایران خاریجی ایشلر باخانی محمد جواد ظریف ایله گؤروشو زامانی ایکی اؤلکه آراسیندا مختلیف ساحهلرده ۲۵ ایللیک آنلاشما ایمضالانمیشدی.