شوشا آذربایجانین کولتور باشکندی اعلان ائدیلدی
علییئو بو ایل مشهور آذربایجان شاعری و فیلوسوفو نظامی گنجوینین آنادان اولماسینین ۸۸۰.جی ایلدؤنومونون قوتلاناجاغینی و ۲۰۲۱ ایلینین "نظامی ایلی" اعلان اولوندوغونو بیلدیردی
آذربایجان پرزیدنتی ایلهام علییئو مدنیت باخانی تعیین ائتدیگی آنار کریموولا ویدئوکونفرانس یولویلا گؤروشدو.
آذربایجانین زنگین بیر مدنیته صاحب اولدوغونو خاطیرلادان علییئو، کریمووا مدنیتین و دیلین قورونماسی و یاشادیلماسی ایله باغلی تاپشیریقلار وئردی.
علییئو بو ایل مشهور آذربایجان شاعری و فیلوسوفو نظامی گنجوینین آنادان اولماسینین ۸۸۰.جی ایلدؤنومونون قوتلاناجاغینی آچیقلادی و ۲۰۲۱.جی ایلین "نظامی ایلی" اعلان اولوندوغونو بیلدیردی.
موغام، آشیقلیق و خالچاچیلیق صنعتلرینین قورونماسی و یاشادیلماسینین اؤنمینه توخونان علییئو، دینی و معماری تیکیلیلرینین قورونماسینین واجیبلیگینه دقت چکدی.
"آذربایجاندا یاشایان ارمنیلر بیزیم وطنداشلاریمیزدیر"
بیر زامانلار ارمنیستان طرفیندن ایشغال اولونموش تورپاقلاردا ۶۰دان چوخ مسجیدین داغیلدیغینا ایشاره ائدن علییئو، "هئچ بیر اولوسلارآراسی قوروم بو مسئلهده ارمنیستانی قینامیر. بیز ارمنی کیلسهلرینی قورویوروق. ارمنی خالقی ایله هئچ بیر پروبلئمیمیز یوخدور و آذربایجاندا یاشایان ارمهنیلر بیزیم وطنداشلاریمیزدیر . بو گون امینهم کی، قاراباغ بؤلگهسینده یاشایان ارمنیلر ده آذربایجان دؤولتینده نورمال یاشایابیلهجکلرینی آرتیق باشا دوشورلر" دئدی.
اساس وظیفهلرینین ارمنیلر طرفیندن داغیدیلمیش تاریخی و مدنیت عابدهلرینین اصللرینه اویغون اولاراق یئنیدن قورولماسی اولدوغونو وورغولایان علییئو، "شوشانی آذربایجان مدنیتینین باشکندی اعلان ائدیرهم. شوشا شهری بونا لاییقدیر. تکجه آذربایجانین دئییل، بؤلگهنین ده مدنیت باشکندی ساییلابیلهجگینی دوشونورهم. شوشانین کولتورول حیاتی زنگین اولمالیدیر. شوشانین یئنیدن قورولماسی اوچون ایشلره آرتیق باشلانیلدی. منیم گؤستریشیمله اورا بؤیوک بیر هئیت گؤندریلدی. شوشا واخت ایتیرمهدن و تلسمهدن اصلینه اویغون اولاراق یئنیدن قورولمالیدیر" دئدی.
"فضولی ویلایتینده اولوسلارآراسی هاوا لیمانی تیکهجهییک"
علییئو باخانا بو ایل شوشادا "خاری بولبول" موسیقی فستیوالی و "واقیف" شعر گونلرینین گئچیریلمهسینی تاپشیراراق، "فضولی ویلایتینده ده اولوسلارآراسی هاوا لیمانی تیکهجهییک. بو ایل ان آزی ائنیش و قالخیش باندلاری حاضر اولاجاق. اورا شوشایا دا یاخین" دئدی.
آذربایجان تاریخینین و مدنیتینین سمبولو اولماقلا یاناشی بؤلگهدهکی حاکم جغرافی مؤوقعیتینه و داغلیق قاراباغین ان بؤیوک شهری خانکندینه گئدن یولدا یئرلشمهسینه گؤره ایستراتژیک اؤنمه صاحب اولان شوشا ۸ می ۱۹۹۲ده ارمنیستان سلاحلی گوجلری طرفیندن ایشغال ائدیلدی.
آذربایجان اوردوسو شوشانی ۸ نوامبردا ایشغالدان آزاد ائتدی.