اولوسلار آراسی عفو تشکیلاتی: ایران‌داکی حادثه‌لرده اؤلو ساییسی ان آز 106

اولوسلار آراسی عفو تشکیلاتی، ایران‌دا بنزین باهالاشماسینا اعتراض گؤستری‌لرینده 21 شهرده ان آز 106 نفرین اؤلدوگونو آچیقلادی.

اولوسلار آراسی عفو تشکیلاتی طرفین‌دن ائدیلن یازی‌لی آچیقلامادا، بنزینه گتیریلن آرتیم سببیله ایران ایچینده باش وئرن اعتراضلار اثناسیندا ان آز 106 نفرین اؤلدوگی آنجاق اؤلو ساییسی‌نین تخمین ائدیلن‌دن چوخ اولابیله‌جگی ایفاده ائدیلدی.

ایران‌داکی محدود مئدیا و اینترنت قاداغاسینا دقت چکیلن آچیقلامادا، تصدیق ائدیلن ویدئو گؤرونتولری، گؤرگو شاهیدلری‌نین ایفاده‌لری و اؤلکه خاریجین‌دکی فعال‌لار طرفین‌دن وئریلن اعتبارلی معلومات‌لارین، گؤستریچی‌لرین امنیت گوج‌لری طرفین‌دن اؤلدورولدوگونو گؤستردیگی قئید ائدیلدی.

آکتیویست‌لرین بعضی نقطه‌لرده دام‌لاردان، بیر دفعه ده هلیکوپتردن سنایپرلر طرفین‌دن هدف آلیندیغی آختاردی.

آمریکان تحریملری‌نین ده تاثیریله ایقتیصادی باخیم‌دان چتین گون‌لر کئچیرن ایران خالقی، 15 نوامبر جمعه گونو بنزینه اوچ قات آرتیم ائدیلدیگی‌نین آچیقلانماسی‌نین آردین‌دان اؤلکه‌نین بیر چوخ شهرینده اعتراضلارا باشلادی.

گؤستری‌لر زامانی بیر چوخ شهرده دولت بیناسی دا تخریب ائدیلدی. تهران رهبرلیگی، اعتراضلارین بؤیومه‌سی اوزرینه شنبه گونو اؤلکه ایچینده اینترنته گیریشی کسدی. مسئوللار بو آنا قدر حادثه‌لر نتیجه‌سینده 5 امنیت ایشچی‌سی و 1 گؤستریچی‌نین اؤلدوگونو آچیقلادی، گؤستری‌لرله علاقه‌دار تخمینن مین 500 نفر ده نظارته آلیندی. ایران حکومتی خالقین اعتراضینی دین‌دیرمک اوچون بنزین باهالاشماسین‌دان الده ائدیلن گلیرین هامی‌سینی، اجتماعی کمکه محتاج 18 میلیون عائله‌یه داغیتاجاغینی ائشیتدیردی.