حسن روحانی، آمریکانین ایستدیگینی قبول ائتمهلرینین مومکون اولمادیغینی بیلدیریب
روحانی، گیلان ایالتینه باغلی لاهیجاندا رشت ایله قزوین شهرلری آراسیندا قاطار سفرلرینین باشلانماسی موناسیبتیله کئچیریلن مراسیمده ائتدیگی چیخیشیندا، آمریکا تحریملرینه دایر بیاناتلار وئردی
ایران پرزیدنتی حسن روحانی، آمریکانین، ایرانین 1979 اؤنجهسی شرطلره قاییتماسینی ایستدیگینی آنجاق بونو قبول ائتمهلرینین مومکون اولمادیغینی بیلدیریب.
روحانی، گیلان ایالتینه باغلی لاهیجاندا رشت ایله قزوین شهرلری آراسیندا قاطار سفرلرینین باشلانماسی موناسیبتیله کئچیریلن مراسیمده ائتدیگی چیخیشیندا، آمریکا تحریملرینه دایر بیاناتلار وئردی.
تحریملرله آمریکانین مقصدینه چاتامادیغینی آنجاق ایران اوچون جیدی چتینلیکلر یاراتدیغینی بیلدیرن روحانی،
" نورمال شرطلرده دئییلیک، پیسکولوژیک و ایقتیصادی بیر ساواشداییک. چوخ اؤنملی و حساس شرط. آمریکا، اؤلکهمیز و خالقیمیز اوچون پروبلملر یاراتدی. آنجاق بو شرطلرده گئری آددیم آتماق بوتون نایلیتلریمیزی ایتیرمک دئمکدیر." دئیه دانیشدی.
آمریکانین بو ایلی (ایران تقویمینه گؤره 21 مارسدا سونا چاتاجاق اولان 1397-جی ایلی) ایرانین مغلوبیتی و اؤز غلبهسینه کئچیرمگی پلانلاشدیردیغینی، آنجاق بونا نایل اولمادیغینی ساوونان روحانی، واشینگتون رهبرلیگینین ایراندا رژیم دییشیکلیگی قارشیسینا مقصد قویدوغونو ایفاده ائدهرک، بونلاری قئید ائتدی:
" آمریکا ایله اولان موناقیشهمیز و پروبلمیمیز واشینگتون رهبرلیگینین 40 ایل اوّله قاییداق ایستمهسیدیر. آمریکا ایرانین 1979دان اوّله قاییتماسی لازیم اولدوغونو سؤیلهییر. آنجاق بیز گئرییه دؤنمیهجگیک و موستقیللیک ایله دموکراسی یولو ایله گئتمهیه داوام ائدجگیک دئییریک. او اوزدن آمریکا ایله یاشادیغیمیز بو فیکیر آیریلیغی موذاکیره و گذشت موضوعسو اولا بیلمز".
روحانی، وئردیگی سؤزو ایلک پوزان طرفین ایران اولماسی اوچون آمریکان رهبرلیگینین جیدی تحریکلرده اولدوغونو و دونیا دا یانینا آلماغا چالیشدیغینی بیلدیرهرک لاکین بونا نایل اولمادیغینی دیله گتیردی.
ایران پرزیدنتی،
" موتتفیکلری اولان آوروپا اؤلکهلری آغ ائوین پلانلارینا بویون ایمهدی. آوروپا بیرلیگی اؤلکهلری ورشو کونفرانسیندا دا آمریکانین یانیندا دورمادی." ایفادهلرینی ایستیفاده ائتدی.
روحانی، اؤلکهده توکهتیلن یاناجاقدولدورما مسئلهسینده اؤزلرینه چاتان بیر سویهیه گلدیکلرینی دیله گتیرهرک، کئچمیشده گوندهلیک 6.5 میلیون لیتر دیزل ایله 12. 5 میلیون لیتر بنزین ایدخال ائتدیکلرینی، ایندی ایسه هم بو بارهده، هم ده دیگر بیر چوخ قلمده اؤز احتیاجلارینی قارشیلادیقلارینی دئییب.
ایران پرزیدنتی روحانی سون اولاراق آچیلیشینی ائتدیکلری دمیر یولو خطینین؛ آفریقا، آسیا، شرقی و شمالی آوروپا ایله بیر چوخ بؤلگه بیر-بیرینه باغلایاجاق بؤیوک بیر پروژهنین ترکیب بؤلومو اولدوغونو ایفاده ائتدی.