محمد بن سلمان پاکیستانا سفر ائدیب

سعودیه عربیستانی و پاکیستان نفت-کیمیا، انرژی و معدنچی‌لیک کیمی ساحه‌لرده 20 میلیارد دو‌لارلیق سرمایه قویولوشو باره‌ده راضیلاشما ایمضالاییب.

رسمی سفرله پاکیستاندا اولان سعودیه عربیستانی‌نین ولیهد شاهزاده‌سی محمد بن سلمان و پاکیستانین باش ناظیری عمران خانین ایشتیراکی ایله ایمضا مراسیمی کئچیریلیب.

ولیهد شاهزاده محمد بن سلمان مراسیمده ائتدیگی چیخیشدا ولیهد شاهزاده اولدوغو 2017-جی ایلدن بری‌دیر ایلک رسمی سفرینی پاکیستانا ائتدیگینی بیل‌دیره‌رک دئییب: "بو اؤلکه‌ده قویاجاغیمیز سرمایه ایکی اؤلکه اوچون ده اهمیت‌لی‌دیر.

ایکی اؤلکه توریزم ساحه‌سینده ده سازیش‌لر ایمضالایا‌جاق. 2030-جو ایلدن سونراکی ایللر اوچون توریست سایینی قارشی‌لیق‌لی اولا‌راق 50 میلیونا چیخارماق ایستییریک.

پاکیستانین باش ناظیری عمران خان ایسه توریزم و نفت-کیمیا ساحه‌سینده داها چوخ امکداش‌لیق ائتمک ایسته‌دیک‌لرینی وورغولایا‌راق بیلدیریب: "کئچیریلن گؤروش‌لرده پاکیستان‌لی زوارلارین سعودیه عربیستانینا سفرلری و ویزا رژیمی‌نین آسانلاشدیریلماسی، بو اؤلکه‌نین حبس‌خانا‌لاریندا اولان 3 مین‌دن آرتیق محکومون آزاد بوراخیلماسی طلب ائدیلدی".

مراجعت‌لردن سونرا کئچیریلن مراسیمده نفت-کیمیا، معدنچی‌لیک، نفت آییرما کارخاناسی، انرژی اوره تیمی، یئنی‌لنه بیلن انرژی لاییحه‌لری، خیدمت سئکتورو ایله گنج‌لیک و ایدمان ساحه‌لرینده 20 میلیارد دو‌لارلیق راضیلاشما سندی و سازیش‌لره قول چکیلیب.