ایران امریکا و آلمانیایا اعتراض ائتدی

ایران آلمانیا حکومتی طرفیندن ماهان هاوا یول‌لاری‌نین اوچوش ایجازه‌لری‌نین لغو اولونماسینا و امریکادا نظارته گؤتورولن ایران دؤولت تلویزیونون آپاریجی‌سی مرضیه هاشمی‌نین حبس مدتی‌نین اوزادیلماسینا اعتراض ائتدی.

ایران خاریجی ایشلر ناظیرلیگی‌نین سؤزچوسو بهرام قاسمی آلمانیا حکومتی طرفیندن ماهان هاوا یول‌لاری‌نین اوچوش ایجازه‌لری‌نین لغو اولونماسی باره‌ده یازی‌لی آچیقلاما وئره‌رک، آلمان حکومتی‌نین قرارینی تأسفله قارشیلادیق‌لارینی بیلدیردی.

قاسمی آلمانیانین بونو "تلسیک و ایضاح ائدیله بیلینمز" قرار کیمی سجیه‌لندیره‌رک دئدی: "بو قرار یقین کی، ایکی اؤلکه آراسینداکی موناسیبت‌لردن ناراحات اولان‌لار طرفین‌دن وئریلن یانلیش معلومات‌لاردان قایناق‌لانیر".

قئید ائتمک لازیم‌دیر کی، آلمانیا نقلیات ناظیرلیگی‌نین سؤزچوسو سیمونا بوسر بازار ارته‌سی گونو فدرال مطبوعات مرکزینده کئچیردیگی مطبوعات کنفرانسیندا ایرانین ماهان هاوا یول‌لارینا عایید اوچوش ایجازه‌لری‌نین لغو ائدیلدیگینی بیلدیرمیشدی.

خاریجی ایشلر ناظیرلیگی‌نین سؤزچوسو کریستوفر بورگر ده قرارا اساس اولا‌راق ایران مخفی خیدمتی‌نین آوروپا‌داکی فعالیت‌لری و ایرانین اورتا دوغودا داخیل اولدوغو موناقیشه‌لری گؤسترمیشدی.

دیگر طرف‌دن، قاسمی ایران دؤولت تلویزیونونون آپاریجی‌سی قادین ژورنالیست مرضیه هاشمی‌نین امریکادا نظارته گؤتورولمه‌سی ایله باغلی امریکانین ایران‌داکی ماراق‌لارینی قورویان سوئیس-ین تهران‌داکی سفیری مارکوس لیتنرین ناظرلیگه چاغیردیغینی بیلدیردی.

قاسمی:"مرضیه هاشمی‌نین نظارت مودتی‌نین اوزانماسی ایله علاقه‌دار ایرانین اعتراضلاری سوئیس-ین تهران‌داکی سفیرینه چاتدیریلدی" دئدی.

ایران دؤولت تلویزیونا باغلی اولان، اینگیلیس دیلینده خبرلر یاییملایان Press TV-نین آپاریجی‌سی امریکان اصیل‌لی قارادریلی قادین ژورنالیست مرضیه هاشمی کئچن هفته عائله‌سینی گؤرمک اوچون گئتدیگی میزوری ایالتی‌نین ست لوئیس شهرینده ساخلانیلیب.

Press TV ژورنالیستین یاخین‌لارینا اساس‌لانا‌راق وئردیگی خبرده هاشمی‌نین امریکا فدرال سوروشدورما بوروسو (FBI) طرفین‌دن واشینگتن-داکی نظارت مرکزینه گؤندریلدیگینی بیلدیریلمیشدی.

خبرده ایران‌لی ژورنالیستین نظارته گؤتورولدوگو زامان حجابی‌نین زورلا آچیلماق ایستندیگی و نظارت مرکزینده حلال قیدا‌لاردان محروم ائدیلدیگی ایره‌لی سورولموشدو.