ایران-دان امریکایا خبردارلیق

ایران حربی دنیز قوه‌لری‌نین قوموتانی آمیرال حبیب الله سیاری امریکانین اوچاق داشیییجی گمی‌سی " USS John C. Stennis"ین ایران سولارینا یاخینلاشماسینا ایمکان وئریلمه‌یه‌جگینی سؤیله‌دی.

ایران حربی دنیز قوه‌لری‌نین قوموتانی آمیرال حبیب الله سیاری ایران اردوسو دافوس اونیورسیته سینین کئچیردیگی "آراشدیرماچی‌لاری تقدیر مراسیمی"نده ایشتیراک ائتدی.

مراسیمدن سونرا مطبوعات نماینده‌لری‌نین سوال‌لارینی جاوابلان‌دیران سیاری: "بو ساواش گمیسی اوزون مودت‌دیر بصره کؤرفزینده یوخیدی، اما اونون کیمی گمی‌لر هر زامان واردی. بیز "Stennis"ین هئچ بیر شکیلده سولاریمیزا یاخینلاشماسینا ایجازه وئرمه‌یه‌جییک" دئدی.

سیاری امریکانین اونلارا قارشی آددیم‌لار آتا بیلمه‌یه‌جگینی و کئچیردیک‌لری حربی مانورلار ایله امریکانین گوج نوماییشینه قارشی دورا بیله‌جک‌لرینی قئید ائتدی.

ایسنا-نین یایدیغی خبره گؤره، امریکانین بؤلگه‌یه شاواش گمی‌سی گؤندرمه‌سی‌نین اونلار اوچون اهمیت کسب ائتمه‌دیگینی وورغولایان سیاری اؤلکه‌لرینی مودافعه ائتمه‌یه حاضر اولدوق‌لارینی سؤیله‌ییب.

امریکا اوچاق داشیییجی گمی‌سی"USS John C. Stennis " دؤرد گون اول بصره کؤرفزینه گیره‌رک، دقت جلب ائتمیشدی.

Stennis  اوچاق داشیییجی گمی‌سی‌نین رهبرلیک ائتدیگی حربی گمی‌لرین فارس کؤرفزینه داخیل اولماسی زامانی سپاه پاسدارانا مخصوص تخمینن 30 گمی اونلاری موشاییت ائتمیش و گمی قروپونا یاخین مصافه‌یه راکت آتمیشدی.

ایران بصره کؤرفزینده امریکا حربی گمی‌لرینه قارشی گئنیش میقیاس‌لی مانورلار کئچیرمیشدی.