کویتده دوزنلنه‌جک کؤرفز امکداش‌لیق کونسئی ایجلاسینا عربیستان کرا‌لی دا قاتیلاجاق
چرشنبه آخشامی و چرشنبه گونلری کئچیریله‌جک ایجلاسدا عربیستان هیاتینه کرال سلمان بن عبدالعزیز صدرلیک ائده‌جک
کویتده 5-6 دسامبردا دوزنلنه‌جک کؤرفز امکداش‌لیق کونسئی ایجلاسینا عربیستان کرا‌لی سلمان بن عبدالعزیزین ده قاتیلجاغی بیلدیریلیب.
دیپلوماتیک منبع‌لردن آلینان معلوماتا گؤره، کؤرفز امکداش‌لیق کونسئی ایجلاسی حاضیرلیق‌لاری اوچون سعودی عربیستان نماینده هیاتین‌دن بیر قروپ، کویته گلدی، چرشنبه آخشامی و چرشنبه گونلری کئچیریله‌جک ایجلاسدا عربیستان هیاتینه کرال سلمان بن عبدالعزیز صدرلیک ائده‌جک.
منبع‌لر، ایجلاسا 6 کؤرفز اؤلکه‌سی طرفین‌دن ایشتیراکین یوکسک سویه‌لی اولاجاغینی و کؤرفز اؤلکه‌لری آراسین‌داکی باغلی‌لیغی قوروماق اوچون دقیق مکانیزم‌لرین قورولماغا چالیشاجاغینی قید ائدیب.
الریاض حاکمیتین‌دن ایسه مسئله‌یه دایر هله کی، رسمی بیر آچیقلاما ائدیلمه‌ییب.
قطر خاریجی ایشلر ناظیری محمد بن عبدلرحمان آل ثانی ده کویتده باش وئره‌جک کؤرفز امکداش‌لیق کونسئیایجلاسی عرفه‌سینده خاریجی ایشلر ناظیرلری سویه‌سینده کئچیریله‌جک ایجلاسا قاتیلاجاق‌لارینی و قطر امیری شیخ تمیم‌ین ده 5-6 دسامبرداکی ایجلاسا قاتیلاجاغینی بیلدیرمیشدی.
کویت‌لی دیپلوماتیک منبع‌لر، کؤرفز امکداش‌لیق کونسئی ایجلاسینا دایر کؤرفز اؤلکه‌لرینه دعوتنامه‌لرین گؤندریلدیگینی و جواب گؤزلدیگینی بیلدیرمیشدی.
سعودی عربیستان، بیرلشمیش عرب امیرلیک‌لری، بحرین و میصر رهبرلیک‌لری‌نین 5 ژوئن‌ده قطر ایله بوتون دیپلوماتیک علاقه‌لرینی کسمه‌لری کؤرفز منطقه‌سینده بحرانا یول آچمیشدی. کویت ایسه بو بحراندا واسیطه‌چی رول اوینامیشدی.
