پاکیستان افغانیستان ایله سرحدینه تیکان‌لی مفتیل چکیر
معلوماتدا بو تدبیرین هر ایکی اؤلکه‌نین خئیرینه اولدوغو وورغولانیر.
پاکیستان اوردوسونون مطبوعات خیدمتین‌دن وئریلن معلوماتدا افغانیستان سرحدین‌دکی تروریست هوجوم‌لارین قارشی‌سینی آلماق مقصدیله "یوکسک تهلوکه‌لی ساحه‌لره" تیکان‌لی مفتیل (سیم خاردار) چکیلمه‌یه باشلاندیغی قئید ائدیلیر.
معلوماتدا دئییلیر: "ایلک مرحله‌ده باجور، محمد و خیبر طایفه‌لاری بؤلگه‌لرینی احاته ائدن یوکسک تهلوکه‌لی ساحه‌لره، ایکینجی مرحله‌ده ایسه بلوچستان ایالتی سرحدینه تیکان‌لی مفتیل چکیله‌جک".
معلوماتدا بو تدبیرین هر ایکی اؤلکه‌نین خئیرینه اولدوغو وورغولانیر.
ایکی اؤلکه آراسیندا دوراند خطی (Durand Line) آدلان‌دیریلان و 19-جی عصرده اینگیلیس‌لر طرفین‌دن چکیلن 2 مین 400 کیلومترلیک سرحد وار.
پئشتون‌لاری ایکی آیری دؤولته بؤلن دوراند خطینی افغانیستان تانیمیر.
ایسلام آباد و کابیل رهبرلیک‌لری اوزون ایللردیر بیر-بیرینی اؤز اراضی‌لرین‌دکی تروریستلره گؤز یومماقدا گوناهلاندیریر.
پاکیستان اؤلکه‌ده سون دؤورده آرتان ترور هوجوم‌لاری‌نین افغانیستاندا فعالیت گؤسترن ترور تشکیلاتلاریندان قایناقلاندیغی سببیندن فوریه آیی‌نین اورتاسین‌دان اعتباراً ایکی سرحد قاپی‌سینی باغلی ساخلاییردی.
پاکیستان باش ناظیری نواز شریف مارتین 20-ده سرحدین یئنی‌دن آچیلماسی باره‌ده امر وئرمیشدی.
