آذربایجان: ارمنیستانا باسقی گؤستریلمهلی
"ارمنیستان طرفی گئجه ساعاتلاریندا یوک ماشینلاری ایله قانونسوز اولاراق مولکی گئییملی عسگرلرینی آذربایجانا گؤندرمهیه جهد ائدیر"
آذربایجانین خاریجی ایشلر باخانی جیحون بایراموو اولوسلارآراسی توپلومو "تورپاقلارینا قانونسوز قوشون گؤندرهن ارمنیستانا باسقی گؤسترمهیه" چاغیردی.
بایراموو آذربایجاندا اولان آوروپادا گوونلیک و امکداشلیق تشکیلاتی دؤنم باشقانی و سوئد خاریجی ایشلر باخانی آن لینده ایله گؤروشدو.
گؤروشمهدن سونرا تشکیل اولونان مطبوعات توپلانتیسیندا دانیشان بایراموو، ۱۰ نوامبر تاریخینده ایمضالانان اوچلو بیلدیریده اسیر دییشیمی مادهسینین یئر آلدیغینی و آذربایجانین بو مسئله ایله باغلی تعهدلارینی یئرینه یئتیردیگینی بیلدیردی.
ساواش زامانی اسیر اولان بوتون ارمنیستان عسگرلرینین اعاده ائدیلدیگینی، اعاده ائدیلن اسیر ساییسینین آذربایجانا قایتاریلان عسگر ساییسیندان چوخ اولدوغونو خاطیرلادان بایراموو،
"ایندی بیزه ائدیلهن بیر چوخ باشوورو و چاغریلارلا باغلی دوروما گلینجه، آذربایجان او شخصلری ساواش اسیر اولاراق قبول ائتمیر. چونکو او شخصلر عملیاتلار زامانی توتوقلانمادیلار. او اینسانلار حربی عملیاتلار بیتدیکدن سونرا ۲۶ نوامبر ۲۰۲۰ده ارمنیستانین شیراک ویلایتیندن گتیریلهن شخصلردیر. اونلار آذربایجان تورپاقلاریندا عسگرلریمیزی و مولکی وطنداشلاریمیزی اؤلدوردو. اونلارلا ایلگیلی آذربایجان قانونلارینا اویغون سوروشدورمالار داوام ائدیر".
بایراموو، ساواشدان سونرا بؤلگهیه عسگر گتیریلمهسینی "قبول ائدیلمز" حساب ائتدیکلرینی و بونون اوچلو بیلدیرینین ارمنیستان طرفیندن بیرباشا پوزولماسینا برابر اولدوغونو وورغولایاراق،
"ایندی ده ارمنیستان طرفی گئجه ساعاتلاریندا یوک ماشینلاری ایله قانونسوز اولاراق مولکی گئییملی عسگرلرینی آذربایجانا گؤندرمهیه جهد ائدیر. بیز قونونو بیرلشمیش میللتلر تشکیلاتی باشدا اولماقلا بوتون اولوسلارآراسی قورولوشلارا چاتدیردیق. بوتون اولوسلارآراسی قورولوشلارا بو مؤوضوعدا ارمنیستانا باسقی گؤسترمهلیدیرلر. بؤلگهده سوردورولهبیلیر باریشین تامین ائدیلمهسی اوچون طرفلر اؤز تعهدلارینی یئرینه یئتیرمهلیدیرلر" دئدی.
لینده ایسه، آذربایجان، ارمنیستان و روسیا آراسیندا ایمضالانان اوچلو بیلدیری ایله آتیشکسین الده ائدیلدیگینی و بؤلگهدهکی وضعیتین دییشدیگینی بیلدیردی.
پروبلئمین دائمی اولاراق حل اولونماسی لازیم اولدوغونو و بو قونودا مینسک قروپونون فعالیتینی دستکلدیگینی دیله گتیرهن لینده، آذربایجان و ارمنیستانین اسیر دییشیمینه داوام ائدهجگی اومودونو بیلدیردی.