Törkiyä wäkile: “Ğazzädä utnı tuqtatu ömet nurın birä”
Törkiyäneñ BMO Daimi wäkilçelegeneñ waqıtlı wäkile Aslı Güvän soñarılğan bulsa da Ğazzädä täêmin itelgän utnı tuqtatunıñ ömet nurın birüen belderde

Güvän BMO İminlek Şurasında İzrail-Fälästin mäs’äläsenä bağışlap oyıştırılğan yuğarı däcäräle utırışta çığış yasadı.
Aslı Güvän: "Ğazzädä täêmin itelgän utnı tuqtatu ömet nurın birä. Utnı tuqtatu kileşüeneñ tulısınça ütälüe, daimi buluı häm Ğazzägä aşığıç humanitar yärdäm citkerelüe bik zur ähämiyätkä iyä”, - dip äytte.
İzrailneñ yöklämälären ütäwneñ täêmin itelüeneñ häm daimi utnı tuqtatunıñ urnaştırıluınıñ möhimlegenä işarät itüçe Güvän İzrailneñ Ğazzädän çigenüe, humanitar yärdämnärneñ aşığıç häm özleksez räweştä anda citkerelüeneñ zarurlığın iskärtep uzdı.
Törkiyäneñ BMO daimi wäkilçelegeneñ waqıtlı wäkile Güvän: "Däwam itüçe qanunsız okkupaśiyä häm Fälästin xalqınıñ xoquqlarınıñ inqâr’ itelüe – tartqalaşunıñ töp êlementları. Törkiyä şuşı töp mäs’älälärneñ xäl itelüenä täwäkkällek belän bulışlıq itä häm daimi tınıçlıq öçen berdänber başqarıla alınaçaq çişeleş bulğan ike däwlät vizionına tuğrılıqlı bulıp tora”, - dide.
BMO Ğomum şurasınıñ 2024nçe yılnıñ sentyabr ayındağı qararına yaraşlı bularaq qanunsız yawlap alunıñ beterelüe häm Fälästinneñ Berläşkän Millätlär Oyışmasınıñ tulı äğ’zase bularaq tanıluı tırışularınıñ arttırıluınıñ zarurlığına basım yasawçı Aslı Güvän: "Soñğı 15 ayda qılınğan cinayätlär cäzasız qalmasqa tiyeş. Kümäk cäzalaw, tınıç xalıqnıñ üleme häm humanitar yärdäm xezmätkärlärenä qarşı höcümnär xökemgä tartılmıyça qalmasqa tiyeş”, - dip belderde.
Daimi häm kiñqırlı tınıçlıqnıñ urnaştırıla alınuı öçen söyläşülärneñ xäzer ük başlatıluınıñ zarurlığın bilgeläp uzuçı Güvän:
"Problemanıñ nigezendäge säbäplärne quzğatıp, qayğı-mixnätneñ betüen täêmin itä alabız häm Yaqın Könçığışta daimi tınıçlıq öçen yaraşlı şartlarnı tudıra alabız. Bu nisbättän İminlek Şurasın üz burıçın ütärgä çaqırabız. İlebez şuşı qısada tırışularnı yaqlarğa häm Fälästin xalqı belän bergä bulırğa däwam itäçäk”, - dip üzeneñ çığışın tögälläde Törkiyä wäkile.