"PKK"nıñ üz-üzen yuq itüdän başqa çarası qalmadı"
Ärdoğan separatist terrorçı oyışmanıñ axırı yaqınlaşuı turında belderde

Törkiyä ilbaşı Räcäp Tayyip Ärdoğan separatist terrorçı oyışma “PKK”nıñ üz-üzen ğamäldän çığarudan başqa çarası qalmawın äytte. Ul Şanlıyrfada AK partiyäneñ kongressında çığış yasadı. Ärdoğan terrorçılıqqa qarşı köräşkä tuqtalıp, separatist oyışma aşa 40 yıl buyı törle sśenariylar tormışqa aşırıluın belderde.
“Bu pıçraq uyınnıñ waqıtı bette. Terrorçı oyışmalar qulı belän bezneñ töbäkne êkspluataśiyäläwneñ çorı uzdı. Terrornı qoral, çara häm marionetka itep qullanu däwere artta qaldı. Separatistçılar bu cirleklärgä qan, küz yäşe, ğazaptan başqa berni kitermäde. Şunı bik açıq häm anıq räweştä äytä alam - terrorçılıq belän ireşerlek berni yuq. Köç qullanu belän qulğa töşererdäy näticä yuq. Qan tügep, üterep ireşäçäk ber maqsat ta yuq. Terrorçılıq belän näticägä kilep bulmawı kürende. Separatist oyışmanıñ üz-üzen yuq itüdän başqa çarası qalmadı”,-dip söyläde Ärdoğan. Ul monnan soñ regionnıñ östennän terrorçılıqnıñ qarañğı külägäsen tulısınça alıp atırğa cıyınuların äytte. “Urtaq geografiyäbezneñ kiyerenkelek häm totrıqsızlıq belän tügel, iq’tisadi, säwdä xezmättäşlege häm keşeläre belän alğı planğa çığuın telibez”,-di Törkiyä ilbaşı.