Ärdoğannıñ telefon diplomatiyäse

Törkiyä ilbaşı Räcäp Tayyip Ärdoğan İtaliya xökümäte räise Djordjiya Meloni, Germaniyä kanślerı Olaf Şol’ś häm Awrupa Komissiyäse başlığı fon der Leyen belän telefonnan söyläşülär ütkärde. Anda Süriyädäge waqıyğalar, regional’ häm global’ mäs’älälär qaraldı.

İlbaşı Ärdoğan İtaliya xökümäte räise belän äñgämäsendä axırğı waqıyğalarnıñ Törkiyä alıp barğan gumanitar häm vöcdanlı säyäsätneñ niqadär döres buluın kürsätüen, ilneñ Süriyädä tınıçlıq, bäysezlek, dialog häm ğadellek yaqlı poziśiyäsen däwam itüen, anıñ cir bötenlegen saqlaw häm totrıqlılıqqa ireşüeneñ ähämiyäten citkerde. Ul İzrail agressiyäseneñ bu yulı Süriyädä kürenüen, älege wäzğıyät’neñ totrıqlılıqqa öleş kertmäwen, ilne terrorçı êlementlardan çistartunıñ şart buluın assızıqladı.

Ärdoğan Germaniyä kanślerı Olaf Şol’ś belän äñgämäsendä dä Süriyädäge xällärgä tuqtaldı.

Ä Awrupa Komissiyäse başlığı fon der Leyen belän söyläşüdä ul Törkiyäneñ alğa taba da Süriyäneñ terrorçı êlementlardan arınuı, berdämlegeneñ täêmin itelüe, cir bötenlegeneñ saqlanuı, barlıq êtnik häm dini qatlamnarnıñ tınıçlıqta yäşäwe öçen tırışaçağın citkerde.

Ärdoğan süriyälelärneñ illärenä isän-imin häm üz teläkläre belän kire qaytuları belän bäyle prośessnıñ planlaştırıluın, Süriyäne qabat torğızu êşçänlekläreneñ monı tizlätäçägen assızıqladı.

Söyläşüdän soñ Ursula fon der Leyen sośial’ media akkauntında belderü yasadı häm kiläse atna başında Süriyädäge täräqqıyät’lär nisbätennän Törkiyägä säfär yasayaçağın, ilbaşı Räcäp Tayyip Ärdoğan belän oçraşaçağın citkerde.