Törkiyä utnı tuqtatu kileşüenä qanäğat'

Törkiyä Livanda utnı tuqtatu kileşüeneñ daimi bulıp qaluın teläwen citkerde. Tışqı êşlär ministrlığı bu mäs’älä belän bäyle belderü yasadı. Anda “Livanda utnı tuqtatunı täêmin itü söyläşüläreneñ uñay näticälänüenä söyenäbez häm solıxnıñ daimi buluına ömetlänäbez” diyelä.

Belderüdä Törkiyäneñ Livanda êçke tınıçlıqnı torğızu maqsatınnan kiräkle yärdämne birergä äzer buluı assızıqlana. “İzrailneñ utnı tuqtatu rejimın qatşıy räweştä ütäwe häm Livanda barlıqqa kitergän zararnı kompensaśiyäläwe öçen xalıqara cämäğat’çelek basım yasarğa tiyeş. Törkiyä Livanda tınıçlıq urnaştıru öçen kiräkle yärdämne birergä äzer. Töbäktä solıx häm totrıqlılıq täêmin itü öçen Ğazzädä kiçekmästän daimi häm külämle utnı tuqtatu iğ’lan itelüe häm İzrailneñ agressiv säyäsätenä noqta quyıluı kiräklegen xäterlätergä telibez” diyelä Törkiyäneñ belderüendä.  

İsegezgä töşeräbez, Livan belän İzrail arasında utnı tuqtatu kileşüe bügen irtänge säğat’ 4tä (Törkiyä waqıtı belän säğat’ 5tä) ğamälgä kerde.