Ärdoğan İstanbulda çığış yasadı

Törkiyä ilbaşı Räcäp Tayyip Ärdoğan axırğı ğasırnıñ iñ ayawsız genośidlarınıñ berseneñ Ğazzädä buluın äytte. Ul İstanbulda İSEDAKnıñ (İslam xezmättäşlege oyışmasınıñ iq’tisadi häm säwdä xezmättäşlege daimi komitetı) cıyılışı açılışında çığış yasadı.  

İlbaşı İzrail höcümnäre astındağı Fälästin xalqınıñ 13 ayda 50 meñeneñ şähit töşüen, 2 million keşene darusız, azıq-töleksez qaldırıp, ülemnäre küzätelüen, moña qaramastan, fälästinlelärneñ ğorurlıqların saqlap qaluın söyläde.

“Axırğı ğasırnıñ iñ ayawsız genośidlarınıñ berse yänäşäbezdä - Ğazzädä buldu häm bara. Sionist rejim häm anı yaqlawçılar 13 ay buyı bar tördäge zolım, bar tördäge genośidnı başqardı. Tik fälästinle qardäşlärebezne tezländerä almadılar”,-dip söyläde Ärdoğan.    

Ul Ğazzä häm Livanğa sionist agressiyäsenä bireläçäk iñ yaxşı cawaplarnıñ berseneñ - tağın da kübräk däwlätneñ Fälästinne tanuı bulaçağın assızıqladı. Ärdoğan İslam dön’yasınıñ, fiker qarşılıqların ber yaqqa quyıp, Fälästin häm Livan xalqına xaqlı köräşlärendä yärdäm itüneñ ähämiyätenä basım yasadı.  

İlbaşı Ärdoğan İzrailneñ genośidına qarşı iñ nıq poziśiyäsen kürsätüçe illärdän berse bulğan Törkiyäneñ qulındağı barlıq mömkinleklär belän fälästinle qardäşlärgä yärdäm itärgä tırışuın äytte. Ul Törkiyäneñ 85 meñ tonnadan artıq gumanitar yök belän Ğazzägä iñ küp yärdäm cibärgän däwlät buluın da belderde.