Rutte Törkiyä belän bergä êşlärgä teläwen belderde

NATOnıñ yaña ğomum särqatibe Mark Rutte terrorçılıqqa qarşı köräşneñ ittifaq qısalarında qaraluı kiräklegen häm bu mäs’älädä Törkiyä ilbaşı Räcäp Tayyip Ärdoğan belän êşçänlekneñ däwam itäçägen söyläde.

Mark Rutte êlekkege NATO citäkçese Stoltenbergtan wazıyfasın qabul itep alğannan soñ Bel’giyä başqalası Brüssel’dä ittifaqnıñ ştab-fatirında täwge matbuğat oçraşuın uzdırdı.

“Kön’yaqtağı üz yoğıntıbızdağı töbäktä totrıqlılıqnı täêmin itü öçen Yaqın Könçığış, Tön’yaq Afrika häm Säxel regionnarındağı xezmättäşlärebez belän kontaktlarnı arttıraçaqbız. İllärebezgä häm xalıqlarıbızğa qarata terrorçılıq yanawına qarşı köräşü öçen tağın da kübräk êşlärgä kiräk,”-dide Rutte.  

Ul Törkiyäneñ terrorçılıqqa qarşı köräş häm berlektäşlär arasında êmbargolarnıñ beterelüe belän bäyle sorawlarına bolay dip cawap birde:  “İlbaşı Ärdoğan belän yaqın dus buluıbıznı häm terrorçılıqqa qarşı köräş mäs’äläsendä ber fikerdä toruıbıznı söyli alam. Terrorçılıqqa qarşı köräşneñ NATO qısalarında qaralırğa tiyeşle mäs’älä buluı açıq”.  

Rutte berlektäşlär arasında qoral satıp alularda çikläwlär quyılmawnıñ ähämiyäten dä assızıqladı.