Ärdoğan kabinet cıyılışınnan soñ belderülär yasadı

Törkiyä ilbaşı Räcäp Tayyip Ärdoğan xalıqara cämäğat’çelekneñ İzrailneñ böten regionğa ut açuına süzsez qala almayaçağın äytte. Ul kabinet cıyılışınnan soñ belderülär yasadı.

Ärdoğan üz çığışında İzrailneñ Livanğa höcümnären tağın da arttıruın, axırğı 2 atnada, balalarnı da kertep, meñnän artıq livanlınıñ ğomere özelüen assızıqladı. Ul bügen İzrail utı astındağı Fälästin häm Livannı yaqlawnıñ - keşelekne yaqlaw, tınıçlıqnı, törle dinnärneñ bergä yäşäwen mömkin qıluçı mädäniyatnı yaqlaw buluın söyläde.

“Ğazzä, Yordannıñ basıp alınğan Könbatış yarı, Livandağı zolımğa iñ zur rizasızlıqnı islam däwlätläre kürsätergä tiyeş. Möselmannar bularaq qan tügügä kirtä buluda dön’yada liderlıq itüebez kiräk”,-dide Ärdoğan.  Ul İzrailneñ höcümnärendä ähämiyätle närsäneñ İslam dön’yasınıñ mönäsäbäte buluına iğ’tibarnı cälep itep bolay di: “Küzlären qan häm näfrät basqan ber uç radikal’ sionist regionıbıznı häm böten dön’yanı utqa sala. Bez bu zolımğa, bu qırğıylıqqa berqayçan da riza bulmayaçaqbız. Xalıqara cämäğat’çelek İzrailneñ böten töbäkne utqa salğan bu banditlığına monnan arı da süzsez qala almas”.  

Ärdoğan “Xamas” qabul itüen beldergän utnı tuqtatu kileşüenä İzrail xökümäten mäcbür itüçe iq’tisadi, säwdä häm diplomatik adımnar yasalmawın, bu ğadelsezlekkä borçıluların da belderde.