Ärdoğan Berläşkän Millätlär Oyışmasınıñ 79 nçı ğomum şurasında çığış yasadı

Törkiyä ilbaşı Räcäp Tayyip Ärdoğan Berläşkän Millätlär Oyışmasınıñ 79 nçı ğomum şurasında çığış yasadı.

“Qayberäwlärgä uñaysız bulsa da, bügen biredäge keşelekneñ urtaq tribunasınnan böten keşelek isemennän çınbarlıqlarnı açıqtan - açıq söylärgä telim”,- dip başladı üz çığışın Ärdoğan.

Ul 7 nçe oktyabr’dän birle İzrail höcümnäre astında bulğan Ğazzäneñ dön’yadağ iñ zur xatın-qızlar häm balalar ziratına äwereleüen belderde.

“BMO İminlek şurası Ğazzädäge genośidnı, varvarlıqnı häm zolımnı tuqtatır öçen närsä kötäsez? Fälästin xalqı belän bergä üz watandaşların da qurqınıç astına quyğan üterü bandasın tuqtatu öçen närsä kötäsez?  Ber kisäk ikmäk, ber qasä aş taba almağan yözlägän ğazzäle bala üterelä. Könbatış yaqlağan qıymmätlär ülä”,- dide ilbaşı.

İzrail citäkçelegeneñ töp keşe xoquqların sanğa suqmıyça ber millätkä qarata êtnik çistartu häm açıq räweştä genośid başqaruın belderüçe Törkiyä ilbaşı Ärdoğan: “Monnan 70 yıl êlek Germaniyädä Gitler keşelek ittifağı belän tuqtatılğan kebek, İzrail prem’yer-ministrı Netan’yaxu häm anıñ üterü bandası da keşelek ittifağı belän tuqtatılırğa tiyeş. Könçığış Qodüs başqalası bulğan, bäysez, suveren Fälästin däwläte buldıru inde monnan arı kiçekterelä almıy. Bez möselmannarnıñ ışanuları arqasında nişan itep alınuına qarşı bulğan kebek, antisemitizmğa da qarşı. Min Fälästinne tanımağan başqa däwlätlärne bu kritik çorda tarixnıñ döres yağında torıp Fälästin däwläten tizräk tanırğa çaqıram”,- dide üz çığışında Törkiyä ilbaşı Räcäp Tayyip Ärdoğan.