Ayşänurnıñ ülem säbäbe açıqlandı
Mediśina êkspertizası anıñ başına tigän yädrä näticäsendä ülüen rasladı
Yordannıñ basıp alınğan Könbatış yarında hälaq bulğan Törkiyä-Amerika aktivistı Ayşänur Äzgi Äygineñ İzrail ğaskärläre tarafınnan üterelüen mediśina êkspertizası rasladı. Töz märgänneñ utlı qoralınnan çıqqan yädrä anıñ baş miyendä kisäklärgä ayırılu, qanaw häm şeşü barlıqqa kitergän. Älege yaralar ülemgä kitergän. Yädräneñ tigez sızıq yasap suldan uñğa taba uzuı açıqlana. İzrail armiyäse alıp barğan tikşerüdä isä aktivistnıñ turıdan maqsat itep alınmawı, yädräneñ cirgä bärelep aña tiyüe äytelgän ide. Êkspertiza isä mondıy mömkinlekne sızıp attı.
Ayşänurnıñ gäwdäsen zur tırışlıqlardan soñ Törkiyägä alıp qayttılar. Ul Aydın töbägendä kümeläçäk.
Süz uñayınnan, AQŞ ilbaşı Djo Bayden 11nçe sentyabr’dä Ayşänurnıñ üleme xaqında yasağan belderüendä bolay digän ide: “Bu bäxetsezlek oçrağına oxşağan. Yädrä cirgä bärelep yalğışlıq belän aña tigän”. Aq Yorttan yasalğan açıqlawda da Äygineñ üleme “faciğale xata näticäse” dip bäyälänä.
Törkiyä häm Amerika watandaşı 26 yäş’lek aktivist Ayşänur Äzgi Äygi 6nçı sentyabr’dä Nablus şähäre yanında oyıştırılğan rizasızlıq çarasında İzrailneñ töz märgäne açqan utta başı yaralanıp wafat buldı.
